Sòldánan venezolano durante un parada relashoná ku Da di Independensia den e pais.
CARACAS (AFP).- Avionnan ruso, drones iraní, tankinan franses i un supmarino aleman bieu. Venezuela ta konta ku 343.000 “hòmber i muhé armá” i ekipo di guera bieu di su Forsa Armá pa por enfrentá -ounke poko probabel awor aki – invashon di parti di Merka. E presidente Nicolas Maduro a denunsiá “e menasa di mas grandi ku tabatin kontra di nos kontinente den último 100 añanan despues di mobilisá di tankinan di guera norteamerikano den Karibe pa operashonnan kontra di narkotráfiko.
“Nan ta buskando un kambio di régimen atrabes di menasa militar i mancha mannan di Donald Trump na sanger”, segun Maduro a bisa na koresponsalnan estranhero. “Si Venezuela keda agredí, nos lo pasa dirèkt na e lucha armá”
Analistanan ta deskartá un operashon militar di parti di Merka kontra di Venezuela. Netamente Merka ta konta ku e ehérsito mas poderoso di mundu.
Poder Humano
Batisá komo bolivariano pa Hugo Chavez, Forsa Armá venezolano no ta skonde su relashon polítiko. ”Chaves ta biba!” awendia ta e saludo ofisial i ta definí su mes komo “sosialista i anti imperialista”. Desfilenan militar ta mustra sòldánan den unifòrmnan táktiko, karanan pintá, armanan di fusil AK47, bazuka i sòldánan ta marcha gritando lemanan polítiko.
No tin sifra ofisial di e integrantenan aktivo. Un informe di Instituto Internashonal di Estudionan Stratégiko a fiha e kantidat na 123.000, mas 220.000 milisiano i 8.000 reservista. Ta trata di un milisia kreá pa Chavez.
Di su parti, Maduro a promové formashon di kuerponan di defensa den empresanan públiko i komunidatnan; “E menasa gringo” pa Maduro ta e sentro dje propaganda ofisial, ku yamada pa unidat nashonal i anunsionan na televishon estatal generá pa inteligensia ofisial ku ta bisa “Mi ta prepará mi mes”.
Segun Maduro, Venezuela ta konta ku 8 mion milisiano i reservistanan, ku ta ekivalente na un tèrsio dje poblashon. Analistanan ta konsiderá e sifranan komo ireal.
