Liberia-Peters ke sa
WILLEMSTAD.- “Ta pa kiko nos tin ‘trias politica’ anto.” Asina èks promé minister di Antianan di Hulandes, Maria Liberia-Peters ta puntra su mes despues di a tuma nota di e akto di firmamentu di un kontrato di hür entre Refineria di Kòrsou i e kompania Oryx Midstream.
Liberia-Peters ta bisa ku e no por a kere ora el a tende ku no a envolví parlamento den e proseso pa yega na e i no tin splika pueblo. Na su opinion gobièrnu den su totalidat tabata debe maske ta un splikashon na esnan ku a bai inskribí i tabatin speransa riba trabou.
Liberia-Peters a kompará e situashon aktual ku tempu el a inisiá ku negosiashon ku PdVSA pa tene refineria habrí. “Mi no a tuma e aktitut pasobra mi ta promé minister ku mi so ta atendé pasobra e interesnan tabata muchu grandi; tabata trata di interes di pais.”
E èks promé minister ta bisa ku el a inkluí lidernan di oposishon den e proseso di negosiashon pasobra a konsiderá ku asuntu di Bullenbaai i refineria na Emmastad tabata di interes nashonal. “Kon ta posibel ku ta permití ku ta gobernante so ta atendé i no ta envolví ku representante di pueblo i pueblo mes.”
Despues di a primintí na vários okashon ku ta habri e refineria pa despues resultá ku e refineria no ta habri, pero ta bai meskla produkto, Liberia-Peters ta haña ku mester a komuniká ku pueblo. “E ta bai pa famianan ku tabata biba den speransa kaminda hèmbernan a bai Hulanda buska trabou i despues manda buska yunan i kasá, famianan ku a a pèrdè nan kas pasobra no por a paga hipotek mas.”
Promé minister Gilmar ‘Pik’ Pisas den su deklarashon na okashon di e akto di firmamentu dia promé di yüli último a atmití ku, manera rumornan ku tabata sirkulá, el a biaha resientemente pa London su so pa asina e konkretisá e palabrashonnan ku Oryx Midstream. El a elogiá ministernan den su gabinete pa a tene su plannan sekreto.
“Nan ta mi kashi di sekreto. Despues ku mi a duna nan detaye kon kos ta kanando den e búskeda di un operadó nobo, esta Oryx i ku mi tin ku biaha pa diferente destinashon sin anunsiá kiko mi ta bai hasi, nada no a sali den publisidat.” Pisas a bai Qatar i despues Inglatera resientemente pa topa ku presidente di Oryx Midstream, Ghanim M. Al Saad loke a resultá ku a firma un kontrato pa operá refineria pa 30 aña.
“Oryx Group no ta un negoshi fantasma pero parti di un konglomerado komersial internashonal ku un bolsa di invershon kuantioso den diferente sektor na diferente parti di mundu. E plannan di Oryx na Kòrsou lo no ta enserá un nivel di polushon manera tabata e kaso den pasado na Refineria Isla”, Pisas a bisa.
Foto:
…Maria Liberia-Peters…
