Mc William ke sa
WILLEMSTAD.- Resientemente a sali den publisidat ku mas ku 8 luna pasá a pèrdè un arma di kandela ku aspirantenan ku ta sigui un estudio na Skol di Polis (ORV) ta usa durante ‘training’. Frakshon di MAN-PIN den parlamento ta mustra ku miéntras ku Minister di Hustisia ta tene akshon pa entregá arma ku ta sirkulá riba kaya ku e meta pa alsa seguridat den komunidat, otro realidat ta ku bou di nanishi di Ministerio di Hustisia i mando polisial a pèrdè un arma di kandela.
E frakshon den un karta ku pregunta pa minister di Hustisia, Shalten Hato, ta bisa di ta disponé di informashon ku ta indiká ku e arma di kandela a pèrdè entre e depósito di arma di polis i ‘training’ ku e aspirantenan ta haña na ORV. “Esaki ta lanta hopi interogatorio kon e proseso di kontròl ta tuma lugá. Ku otro palabra, kon ta atendé ora ta fia arma for di e depósito pa bai kuné, i kon ta registrá ora ku entregá e armanan aki bèk na e depósito.”
Tambe e ta lansa pregunta riba seguridat di e instalashon di e depósito di arma di polis. Al final mester saka konklushon for di kiko a bai robes, kon pa remediá e fayonan i alabes tene esnan ku a faya responsabel. Algu asin’aki hamas por bolbe tuma lugá, lider di frakshon, Giselle Mc William, ta indiká den e karta.
E ke sa di e minister si ta bèrdat ku tin arma di polis pèrdí for di 8 luna pasá, ki tipo di arma di kandela esaki ta, i si e minister por indiká si a entregá un denunsia na momento ku a ripará ku arma di kandela a disparsé. Tambe e parlamentario ta puntra si minister Hato por indiká si tin un investigashon independiente tumando lugá relashoná ku e arma di kandela ku a pèrdè, i si a interogá tur esnan envolví. “Minister por indiká kon e proseso di fia i entregá arma di kandela ta tuma lugá na e depósito di arma di polis, i minister por indiká si e depósito su infrastruktura ta segun reglanan di seguridat”, Mc William ta puntra.
