E kolombiano José Medina, kondená pa motibu di a bringa na fabor di Ukrania kontra di Rusia.
MOSKU (AFP).- Un tribunal atministrá pa Mòsku den e region ukraniano okupá di Donetsk, a kondená dos siudadano kolombiano na 13 aña di prizòn despues di a keda akusá di a bringa pa forsanan ukraniano, segun fiskal general di Rusia a anunsiá. E ofisina di fiskal a bisa na Telegram ku Alexander Ante i José Medina a keda kondená pa a partisipá komo “mersenarionan” den hostilidat na fabor di Forsanan Armá di Ukrania.
Medina (37) i Ante (48), tur dos eks-sòldánan di ehérsito kolombiano, a disparsé durante di seis siman despues di a yega Venezuela den un eskala dia 18 di yüli di 2024 ora ku nan tabata regresá nan pais.
Den yüli di 2024 e dos eks militarnan a plania pa regresá nan kas na Papayá, departamento di Cauca, den zùitwèst di Colombia. Nan a bula for di Madrid pa Caracas, for di unda nan mester a sigui pa Bogotá, pero di einan nan famianan a pèrdè nan.
E korant kolombiano El Tiempo, a publiká ku nan a keda detené na e kapital venezolano pa polis dje pais ku ta aliado di Rusia. Dia 28 di ougùstùs di 2024, un tribunal di Mòsku a anunsiá detenshon provishonal di dos kolombiano, akusá di ta “mersenarionan”. Rusia, ku den febrüari di 2022 a lansa un ofensiva den Ukrania, ta konsiderá komo “mersenario” kualke estranhero ku ta lucha den tropanan di Ukrania, un akusashon pa kua tin15 aña di prizòn, i ta nenga na trata nan komo prezunan di guera pa kua tin sierto protekshon di akuerdo ku Konvenshon di Ginebra.
Den último tres añanan, vários strañero a keda husgá pa tribunalnan situá den teritorionan ukraniano okupá pa Rusia.
