WILLEMSTAD.- Hues Eskes  ayera den su desishon a subi kastigu di  Rodolfo Elstak(40) di 7 pa 8 aña i a bai di akuerdo ku e demanda di 9 aña pa Limar “Nito” Mongen i 8 aña pa Cristino “Niño” Oleana.

Ta trata di e atrako ku a tuma lugá na altura PSB, kaminda e hòmbernan a bai ku 192 mil  525 florin for di e propietario di Tu i Yo Lottery dia 2 di yüni último.

Relashoná ku e kaso un dia promé ku e atrako, e hòmber di e fam Nita a bira víktima, despues ku tur e 3 akusadonan a blòki’é, batié i bai ku su vehíkulo ku a wòrdu usá pa fuga despues di e atrako na PSB.

Tambe korte a trata kaso di atrako riba un pareha turista kual Elstak ta keda akusá di dje. E akusado Mongen ta keda akusá tambe di a agredí e hòmber S.N. den sèlnan di Barber ku un djùk di eis den su kabes. El a bati e víktima te bula su tambú di orea.

Segun Ministerio Públiko, Oleana i Mongen a kometé e atrako di 192 mil florin riba e doño di Tu i Yo Lottery, miéntras e dos akusadonan femenino , I. Oleana (22) i N. Rojer-Balentina (22) ta esnan ku a fasilitá e fuga, despues ku nan a para warda e hòmbernan.

Elstak ku no ta den e akusashon di e atrako di 192 mil florin, durante di e kaso direpente a lanta bisa, ku e ta esun ku a kometé e atrako.

El a pidi hues pa laga tur hende bai kas. Elstak a deklará ku un chamo a bis’e pa nan bai kometé e atrako. El a bisa Mongen un dia promé i nan a bai na e parkeerplaats di Goisco pa wak e komersiante. Despues Mongen a ninga i a bisa ku e ta hala tras. Segun Elstak e ku e venezolano so a bai. E ta esun ku a ranka e e tas for di e komersiante i dal e ku pipa. Ora ku polis a konfront’é ku e deklarashonnan di e víktima, e detayenan no tabata kuadra ku loke el a deklará. Fiskal a bisa ku Elstak kier  tuma e kulpa di Mongen riba dje.

Ministerio Públiko ta akusá Mongen i Oleana  di ta esnan ku a baha pone arma na kabes di e komersiante kita su sèn for di dje. Nan a menas’é pa keda ketu sino nan lo tir’e mata. Despues nan a agredié ku e arma den su kabes i lag’é tur na sanger. Mongen a wòrdu rekonosé debí ku e no tabatin kara tapá.

Hues a splika ku polisnan via imágennan di kámara a mira kon Mongen ta drenta  e vehíkulo di fuga di e dama  despues ku e atrako tuma lugá den área di Kwartier. Na polis e akusado femenino Oleana a deklará ku un dia promé Mongen a bis’é ku e tin un ganga di bai kome riba Parkeer plaats di Goisco i ku e lo tin ku yud’é. Mainta el a manda e alokashon pa e dama pa busk’e. Oleana a bisa ku ora el a bai buska Mongen, e tabata huntu ku Cristino. Mongen tabatin un tas den su man i a bis’e ku ta un persona ku ta depositá hopi sèn a dun’é e informashon. Banda di esei, Mongen a bis’é ku e mester duna un otro hende e maleta di sèn. Mongen a pidié pa bende òf spùit e outo ku el a bini kuné. El a pidi Mongen 13 mil florin.  Mongen a bis’é ku e dun’é e sèn, e no ta keda ku nada i ta sèn pa e por invertí den kunuku. Despues di esei nan a kore bai Ronde Klip. Mongen a keda para riba ku e deklarashon di e dama ku e tin un aventura kuné, no ta bèrdat. Durante tratamentu di e kaso den pro forma, Oleana a  bisa ku ora el a wòrdu detené el a spanta i papia hopi kos ku no ta kuadra. Fiskal a haña tur e akusashonnan probá. Fiskal a bisa ku te awe no sa kiko a pasa ku e botin. Fiskal a splika e dañonan ku a keda hasí na e víktimanan ku te awe  a keda ku trouma. Anita su outo ku e ta hiba su yunan skol, tambe no ta sirbi mas. Mirando tur esakinan fiskal a yena na e demanda di 7 aña pa Elstak, 9 aña pa Mongen i 8 aña pa Oleana . Hues a haña tur e akusashonnan kontra e akusadonan probá i a hisa kastigu di Elstak ku 1 aña di 7 pa 8 aña, Mongen 9 aña i 8 aña pa Oleana.

 

 

LAGA UN KOMENTARIO

Please enter your comment!
Please enter your name here