WILLEMSTAD.- Durante un kontròl, polis a listra den un vehíkulo i a haña un kantidat di mariwana skondé den vários parti di esaki.

Relashoná ku e kaso aki, e hòmber D.R. (43) a keda akusá pa poseshon  di 128 gram di mariwana. Tambe polis a konfiská su  vehíkulo.

E akusado a presentá den sala di korte pa trata su kaso. El a aseptá ku e tabatin  e droga den su poder, pero el a bisa ku e kantidat no ta kuadra.

Segun e akusado, e droga tabata lorá den vários tape i esaki tambe ta yuda oumentá e peso.

E akusado a bisa ku ta fo’i yòn el a kuminsá usa mariwana. Den pasado el a haña aksidente i a keda ku sierto dolónan tin ora, p’esei e ta usa mariwana pa pasa e dolónan.

Wes a relatá ku polis a haña e mariwana na vários parti di e vehíkulo.

Segun akusado, e mariwana ta pa su propio uso  pa motibu ku tur ora e mester di dje.

Polis a tene un entrada hudisial na su kas i bai ku basta artíkulo.

Fiskal a haña e akusashon probá i a demandá e akusado na 180 ora di trabou pa komunidat di kual 90 kondishonal.

Wes den su desishon  no a mira motibu pa desviá i a bai kompletamente di akuerdo ku e demanda di fiskal.

LAGA UN KOMENTARIO

Please enter your comment!
Please enter your name here