Miembronan di gèng será den prizòn na El Salvador, di kua hopi ta detené sin ningun órden hudisial.
SAN SALVADOR (AFP).- Hustisia di El Salvador, kaminda e presidente Nayib Bukele ta hibando un “guera” kontra di gèngnan, a kondená desena di miembro di Mira Salvatrucha (MS-13) na vários siglo di prizòn, inkluso unu na mas ku mil aña. For di mart di 2022, Bukele ta enfrentá gèngnan den un”régimen di eksepshon” ku ta permití pa arestá esakinan sin un órden hudisial. Mas ku 90.000 persona a keda detené i den kareda di 8.000 liberá pa motibu di ta inosente.
Ministerio públiko salvadoreño a duna di konosé ku 248 miembro dje gèng di MS-13 risibí “kondenanan ehemplar” pa 43 asesinato di 42 desaparishon di personanan, sin detayá e fecha di sentensia òf si nan ta forma parti di un kaso grandi.
Un dje miembronan di gèng, katalogá komo “terorista” di parti di Merka, a risibí kastigu di 1.335 aña di prizòn. Otro dies a keda kondená n a 958, 880, 739, 745, 739, 702, 639, 543, 530 i 463 aña. Ta trata di kasonan relashoná ku krímennan kometé entre 2014 i 2022 i hopi di nan tin di aber ku ekstorshon di komersiantenan, invashon di kasnan di famia i droga.
Segun e organisashon “Socorro Jurídico Humanitario”, un kantidat di 454 persona a muri den prizòn dje pais for di 2022.
Apesar di e krítikanan, otro gobièrnunan di region a anunsiá di lo implementá medidanan similar kontra delinkuensia den nan pais. Bukele resientemente a bisa di lo kompartí su eksperensia kue presidente di Costa Rica, Rodrigo Chaves, kende ta enfrentá un oumento di kriminalidat den su pais.
