WILLEMSTAD.- Trainer di selekshon nashonal di futbòl, Dick Advocaat, awe mainta 10’or o tin su promé rueda di prensa awor ku e ta bèk na kabes di selekshon di Kòrsou. Advocaat ta bèk na timon i p’esei lo ta interesante pa tende kiko ta su promé reakshonnan. El a para na kabes dje selekshon ku a klasifiká pa Kopa Mundial, pero pa motibunan ya ampliamente konosí, a hala un banda pa un periodo. Awor e ta oké pa tuma e enkargo pisá pa dirigí e selekshon nashonal durante di Kopa Mundial ku ta start aki un luna.
Den konferensia di prensa awe, di ‘zoom’ for di Hulanda, Advocaat entre otro lo presentá su lista di hungadónan pa próksimo kompromisonan di preparashon, ounke defakto por bisa ku mas bien selekshon sigur mester ta 90% kla teniendo kuenta ku deadline di FIFA.
Kòrsou tin dos wega di training na kaminda, di kua e último lo ta dilanti di e públiko lokal aki na Kòrsou den Stadion Ergilio Hato. Sigur interesante pa tende awe kiko ta bira e siguiente paso i pa e motibu ei e espektativa ta haltu pa tende awe for di boka dje propio Advocaat kon lo e sigui ku e etapa final di preparashon di selekshon di Kòrsou.
