WILLEMSTAD.- Leading with Integrity Foundation (LWI) a tene su eksitoso konferensia anual di integridat pa di 6 aña konsekutivo. E konferensia tabata bon bishitá, i a konta ku presensia di Su Ekselensia Gobernador di Kòrsou, Sra. Lucille George-Wout i tambe mandatarionan i miembronan di parlamento. Ademas diferente lider di empresanan, di institutonan edukashonal i tambe di servisionan di gobièrnu a partisipá n’e konferensia kual tabata titulá: ‘Emotional (In)stability in Leadership’.
E diskurso di apertura tabata na enkargo di Fiskal Mayó Interino, sr. Guillano Schoop, siguí pa presidente di LWI, Sr. Nelson Foendoe, kende tambe a hiba palabra. Despues e oradó prinsipal, Dr. Paul Copan prosedente di Florida, Merka, a duna su diskurso.
Meta di e konferensia tabata pa señalá e diferente formanan di instabilidat emoshonal ku ta stroba lidernan di funshoná optimalmente. Despues di presentashon di e oradónan, e partisipantenan a haña oportunidat pa deliberá den gruponan mas chikí tokante e impakto ku inmadures emoshonal tin na trabou, pero tambe kon e ta afektá henter komunidat. Ademas a interkambiá ideanan tokante kiko mester hasi pa minimalisá e impakto negativo akí i ekipá lidernan pa por krese emoshonalmente. Na final kada partisipante por a evaluá pa nan mes den kua área nan mester desaroyá emoshonalmente komo lider i komprometé nan mes na traha pa mehorá esaki.
“Nos ta masha satisfecho ku e partisipashon aktivo i komentarionan positivo ku nos a haña serka partisipantenan di e konferensia”, asina Nelson Foendoe, presidente di LWI a ekspresá. El a sigui bisa, “Esaki ta indiká ku lidernan tin nesesidat pa trata temanan práktiko relashoná ku integridat, i p’esei nos lo sigui organisá mas konferensia, duna workshop i duna kurso di integridat na nos School of Integrity pa sigui eduká i ekipá lidernan i otronan den nos komunidat pa nan por ta siudadanonan íntegro.”
Pa klousurá, LWI a tene un rifa bou di tur partisipante na e konferensia, i e felis ganadó a resultá Dinaida Bartholomeus, kende a risibí un beka pa por asistí n’e Kurso Básiko di Integridat na School of Integrity na aña 2023.
