WILLEMSTAD.- Un bario ta e sitio sagrado kaminda hende ta biba, pues e hende mester sinti su mes felis i kómodo den su bario. ‘Desaroyo di bario’ ta alabes un di e puntonan di lansa primordial den e Programa di Urgensia di partido MAN-PIN. E partido ta di opinion ku no ta betòn ku asfalt ta forma un bario i den e kuadro aki ta organisá dia 22 di febrüari un konferensia internashonal ku oradónan spesialisá riba e tópiko di bario.
E oradónan durante e konferensia aki ta: Richinel Bulbaai ku lo elaborá riba e tema di ‘sostenibilidat den barionan di futuro’, Leandro Pereira Morais di Brasil ku lo elaborá riba e tema ‘koperativismo den kuadro di urbanismo nobo i bibienda pagabel’, Marien de Langen di Ulanda i konosedó di Kòrsou ku lo profundisá den e tema ‘bibienda pagabel den barionan moderno’ i Chris Zwiers, yu di Kòrsou ku ta traha komo arkitekto internashonal, lo elaborá riba e tema ‘desaroyo di barionan den naturalesa’.
…Richinel Bulbaai…
E konferensia ta tuma lugá na World Trade Center. E ta kuminsá 9’or di mainta i lo dura te ku 2’or di mèrdia. Despues di e diskursonan lo tin espasio pa hasi pregunta i dialogá ku e oradónan. E konferensia, sinembargo, lo no keda solamente na papia i diskutí. Lo traha un modelo di un bario nobo a base di un “maquette”.
Di e forma aki por mira den práktika kiko kier men un bario nobo i moderno kaminda tur fasilidat nesesario ta presente. Lo traha e modelo aki “live” huntu ku ekspertonan lokal den sala. E Konferensia Internashonal aki ta grátis, pues e ta habrí pa tur hende ku ta interesá.
Mirando e entusiasmo ku ta reina i e interes demostrá pa partisipá, MAN-PIN ta pidi pa tur hende mèldu via Whatsapp na: 563-2077 ku nan lo bai ta presente.
…Marien de Langen…
…Chris Zwiers…
