PARIS, AP.- Algun manifestante di e movementu Chaleko Hel, a konfrontá ku polis despues di un marcha pasífiko na Paris, pero e medidanan di seguridat mas severo i e prohibishon di protesta den algun bario a evitá un destrukshon similar na esun di un siman pasa den e kapital di Fransia.
E movementu, kual a wòrdu formá kuater luna pasá a atraé un grupo mas grandi djasabra kompará ku simannan resien, ounke e violensia di fin di siman a afektá e sosten general di e kousa. E manifestantenan kier mas sosten pa trahadó i penshonadonan i ta afirmá ku presidente Emmanuel Macron ta faboresé e grupo élite den Fransia.
Míles di manifestante a marcha pasifikamente den Paris durante e di 19 siman konsekutivo di protesta i a terminá den katedral di Kurason Sagrado, ku un bishita na e siudat desde e bario históriko Montmartre.
A surgi tenshon na momentu ku un grupo mas chikitu di manifestante ku maskarada a sende barínan di shushi na kandela i tira proyektil miéntras nan tabata dirigí pa Place de la Republique den parti wèst di Paris. Polis antimotin a tira gas lakrimógeno pa plama e manifestantenan.
