Kontrolá hendenan indokumentá i laga nan bai!
WILLEMSTAD.-Informashon ku EXTRA ta disponé di dje ta indiká ku ayera a topa ku vários persona indokumentá, pero manera a keda anunsiá kaba no tin mas lugá den barak. Outoridatnan a kontrolá e personanan indokumentá pa arma i droga na momentu ku a topa nan na kosta pero despues a laga nan bai. Mas despues un otro patruya a topa e grupo di hende ta kana i mesora a puntra sentral di polis, pero aparentemente ‘niun hende no sa di nada’.
Ya kaba tin informashon ta kore rònt ku a detené 17 persona indokumentá ayera i ku debí ku no tabatin mas lugá den barak ta parse ku e solushon ‘kreativo’ ta di laga nan kana liber numa.
Siguiendo ku e investigashon di e desaroyo aki EXTRA a haña informashon ku na Fuik, riba tereno di Maal un boto lo a yega tera ku 23 persona indokumentá mas. Habitantenan di Fuik i besindario mesora a yama polis, indikando ku tin un grupo grandi di persona ta kana direkshon pa Punda. EXTRA lo sigui buska mas informashon relashoná ku e kaso aki pasobra Kòrsou tin hopi doló di kabes kaba e.o ku hopi hende ku no ta trahando, hopi den situashon sosial basta difísil i pa koroná e obra e situashon finansiero, sosial i ekonómiko di Kòrsou ta unu di prekupashon hopi serio.
