LIMA, PERU, AFP.- Kongreso di Perú a deklará e presidente di Mexico, Andres Manuel Lopez Obrador komo “persona non grata” pa deklarashonnan ku el a hasi kontra e presidente peruano, Dina Boluarte.
Obrador a bisa ku Boluarte a apropiá su puesto i ku e ta kontra pa entregá presidensia di e bloke komersial latinoamerikano Aliansa Pasífiko na Boluarte.
Boluarte a yega na poder despues ku e èks presidente iskierdista di Perú, Pedro Castillo, a wòrdu akusá i arestá pa purba disolvé parlamento i goberná atraves di un dekreto den desèmber último.
E remplaso di Castillo a wòrdu kritiká pa aliadonan latinoamerikano iskierdista inkluyendo Mexico, ku a duna asilo na e kasá i yunan di Castillo.
Boluarte a anunsiá remplaso di e embahador di Perú na Mexico, i na komienso di e luna aki Lopez Obrador a ninga di entregá presidensia di Aliansa di Pasífiko na Perú. E presidente ta argumentá ku Boluarte no ta presidente legítimo.
Djaweps legisladornan di Perú a aprobá 65 voto kontra 40, ku dos apstenshon. Esaki tabata un moshon kontra Lopez Obrador pa violá “e prinsipio di no interferensia den asuntunan” di un otro estado.
E moshon a instruí e ministerionan di eksterior i interior pa tuma medidanan nesesario pa sigurá ku e presidente di Mexico no ta subi e teritorio nashonal.
