WASHINGTON, AFP.- Kámara di representante di Merka mester aprobá un oumento temporal di e plafòn di debe te ku desèmber pa asina evitá un kaida di e ekonomia mundial di mas grandi.
Ku mayoria den e kámara abou, e demokratnan mester aprobá e proyekto ku a bai Senado pa despues e keda presentá na presidente Joe Biden.
E momentu ku e drenta na vigor, e lo oumentá e límite máksimo di debe di Merka di 480 mil mion di dòler i lo permití e pais honrá tur gastu te ku desèmber, i esaki apesar di diskushonnan den Senado.
“Nos no por tolerá ku e polítika partidario tuma rehen di nos ekonomia i ku no permití nos ku e rutina di pago di nos kuentanan keda kombertí den un espektákulo polítiko ku ta kibra e konfiansa den Merka kada dos aña òf kada luna”, asina e bosero di Kas Blanku Jen Psaki a bisa siman pasa.
Pa IMF ku e siman aki tin su asamblea ku banko Mundial, Merka mester haña un solushon riba término mas largu den asuntunan di debe, ku ta konsiderá inklusive e eliminashon di e tòp di debe, asina e ekonomista i hefe di e fondo Gita Gopinatgh a bisa ayera.
