PARIS, Fransia (AFP).- Presidente di Fransia Emmanuel Macron, a atvertí ayera kontra “regreso” dje debate riba kastigu di morto den paisnan manera Fransia, 45 aña despues di su abolishon. El a hasi esei durante e di nuebe kongreso mundial na Paris riba pena kapital.
China, Iran, Arabia Saudita i Irak ta e kuater paisnan ku a realisá e kantidat mas haltu di ehekushon den 2024, segun e organisadónan dje kongreso.
Outoridatnan iraní a ehekutá por lo ménos 1.639 persona den 2025, un rèkert for di 1989, segun Iran Human Rights, ku sede na Noruega.
“E bataya pa e abolishon ta eminente pasobra awe, den nos sosiedatnan, e debate ta bolbe lanta kabes”, segun e presidente franses. E ta konsiderá ku e lucha kontra di kastigu di morto ta sigui eksistí pa sosiedatnan demokrátiko.
E debate ta lanta kabes bèk na Fransia suseso ku konmové e sosiedat, manera t’e kaso resien di asesinato i violashon di un mucha muhé di 11 aña na man di un hòmber kontra ken tin denunsia di ta abusá seksualmente di muchanan.
Mas ku dos terser (68%) di fransesnan den un referendum a deklará nan mes na fabor pa restablesé kastigu di morto pa krímennan ku ta afektá muchanan, segun resultado di un enkuesta dje instituto CSA.
“Kastigu di morto nunka a hasi un sosiedat mas sigur, nunka. Pasobra e no ta kambia e pensamentu di hende, e ta falsu. Esaki a keda demostrá”, segun Macron a alertá.
