Junny Harms i Roland Rodriguez Bonito
Special Olympics ta un movementu global ku ta usa e poder di deporte pa empoderá individuonan ku un ke otro desabilidat intelektual, yudando nan gana konfiansa, aseptashon i goso pa medio di logronan atlétiko i inklushon. Special Olympics a keda fundá na 1968 i ta sirbi mas di 5 mion atleta den mas di 190 pais. Roland Rodriguez Bonito (ta sertifiká internashonal komo entrenadó di USBC bowling) ta entrenadó kabesante di e tim di bowling i Juny Harms ta direktor nashonal di Special Olympics i nan a konta nos di e aktividatnan di Special Olympics i tambe enpartikular di e Bowl A Thon di awe djasabra na Sambil di 6or di atardi pa 9or di anochi.
Forma parti di e grupo
Special Olympics ta den 190 pais rònt mundu i e ta sigui krese. Junny Harms a splika Djasabra ku nan no ta mará na un movementu olímpiko i konsekuentemente bo por bira miembro independiente. E ta solamente pa e individuo ku un desabilidat intelektual, aunke segun Junny e spèktrum ta hopi amplio, pasobra un persona ku un dòbel desabilidat, esta, físiko i intelektual tambe por forma parti di e organisashon. E promé ta esun intelektual.
For di 1990 na Kòrsou tambe
Na Kòrsou Special Olympics a lanta na 1990. Nan a lanta ku un komishon ku dos deporte so ku tabata landamentu i atletismo. Pero nan a krese i a purba diferente deporte i kada un ku su éksito. E éksito ta dependé di e interes, kooperashon di mama/mayornan, kooperashon di boluntario, di gobièrnu i den e kaso aki FDDK i tur ta forma parti pa tin un programa eksitoso. E ta fluktua. Awor akí tin e deportenan ku ta futbòl, natashon, bowling, bolas, powerlifting i triathlon. Den pasado tabatin tambe korementu di kabai, gòlf i vários mas. Un tempu tabatin asta ‘beach’ vòli. Tur kos ta dependé di e infrastruktura, transporte i hende pa yuda esta, boluntarionan. I e nesesidat di mas grandi ku nan tin ta hende pa yuda, esta boluntario, segun e splikashon di Junny. Esaki ta debí na e orario di trabou ku no ta haña boluntario fásil. Ora di trein mester ta ora solo baha un tiki pero den e kaso ei bo ta haña vèltnan okupá i e boluntario tin su famia tambe.
E reto
Traha ku un persona ku desabilidat intelektual ta un reto, Roland ta boluntario pa hopi aña kaba i el a splika nos ku e trabou akí ta un reto pasobra nan ke siña e persona. Pero e hende mes no ta duna bo hopi trabou. E reto ta ku bo ke pa nan subi. Den su kaso e ta mas den bowling i e por konta ku ta tiki tiki ta siña e atleta, adaptá e kosnan pa e por siña, segun su tempo. Nan a yega asina leu ku 2 aña pasá nan a bai World Games i a gana vários. Junny a komplementá loke nos a yama un reto i a bisa ku un persona ku no tin un desabilidat tambe ta un reto pasobra niun kaminda tin skibi ta kiko e tin di hasi presis. “Pero den nos vèlt bo ta traha ku boluntario ku ta bini ku e smak. Roland ta bin sin e enseñansa su tras pero ku sa hopi di bowling. El a siña konosé e grupo i el a enrikesé su mes. Roland ta un hende analítiko i ora bo dun’é un kos e ta bai les’e, puntra i ehekut’é. Tin boluntario ku ta hopi tékniko i ku ta siña di e grupo di enfoke i nan ta profundisá nan mes den e nesesidatnan ku ta e parti médiko, e parti di abla ku ta bai un tiki mas slou i ta hopi práktiko. Pero tin hende tambe ku a hasi e enseñansa médiko, a hasi e skol i nan no tin e sabiduria tékniko. E boluntario ideal ta esun ku tin tur dos i esei ta keda un reto”, segun Junny. Roland a konta nos kon el a kapasitá su mes, siguiendo kursonan i a logra su sertifikadonan pa e ta bon den loke e ta hasiendo ku e grupo di personanan ku un desabilidat intelektual.
140 registrá
E deporte ku tin mas afinidat na Kòrsou ta Bolas pasobra e ta den e oranan ku mas por práktika i tin deportistanan di edat. Bolas ta un deporte di ménos spit. Bowling tambe tin hopi pero e fasilidatnan ta tiki pa por praktik’é i p’esei tin lista di espera. Banda ku nan tin di wak e parti di fasilidatnan tin tambe e plachi finansiero kaminda nan preokupashon ta transporte. Boluntarionan por haña pero si no tin transporte ta tantu bal. E ta keda un parti tékniko ku nan ta sinti mas tantu. Hopi bia e entrenadó no sa kiko esaki ta trese kuné i nan komo organisadó tin di wak e parti di seguridat di e partisipante. Pa loke ta e kantidat di personanan ku un desabilidat intelektual ku ta forma parti di Special Olympics na Kòrsou, Junny Harms a splika ku aktualmente tin 140 registrá aunke e ta mas, pasobra tin un parti ku no ta registrá. Pero tin algun registrá tambe ku no ta bini. Ta bin aserka tambe ku si e atleta registrá haña trabou, nan ta pèrdè. Asina nan a pèrdè atletanan den natashon i den korementu ku tabata masha bon mes.
Bowl – A – Thon
Aktualmente tin preparashon pa yega Reno Nevada na 2026. I den e kuadro aki, awe djasabra 21 di yüni tin e Bowl -A- Thon na Sambil pa rekoudá fondo. Roland a splika Djasabra ku nan ke rekoudá fondo pa Bowling pero pa Special Olympics den su totalidat. Tambe nan ke pa siña tur hende ku e individuo ku un desabilidat intelektual tambe ta parti di nos komunidat. Mester hinka nan tambe den komunidat. Tin hende ta kere ku e hendenan aki mester ta apart pero mester tin inklusividat. Esaki ta un di e metanan internashonal pa nan tambe ta forma parti di mundu. I p’esei e Bowl -A- Thon di awe na Sambil di 6or pa 9or di anochi. Lo tin algun invitado di peso ta bini. Entre otro lo t’ei promé minister Pisas ku lo tira bala huntu ku e atletanan. Lo tin mas minister tambe presente. Tin kompania ku no por t’ei pero ta kontribuí ku sèn komo donashon. “Nos idea di e Bowl -A- Thon ta pa e kompania bai ku 3 trahadó i nos ta pone un di Special Olympics pa unifiká, segun Roland. Junny a bisa ku nan a siña den pasado ku ora duna e persona e chèns pa e siña konosé e persona, e ta kambia su forma di pensa. E diversidat di Kòrsou ta ‘great’ pero e no ta yega na e persona ku desabilidat. Ora laga e hende interaktuá ku otro, e pensamentu ta kambia.
Kòrsou ta hopi dilanti
Relashoná ku e inklusividat di e persona ku desabilidat intelektual, Junny a bisa ku den Karibe Kòrsou ta resaltá hopi bon. Nan ta e promé ku a kuminsá ku e weganan unifiká. Pa ku mundial mester bai un tiki mas dilanti. I den e kuadro aki na novèmber awor tin e Kingdom games na Kòrsou i nan ta proponé pa tin ‘unified soccer’ esta futbòl unifiká. I esaki ta algu ku no tin ni na Ulanda segun Junny. Ku esaki nan ta proba un biaha mas ku aki na Kòrsou nan ta basta adelantá i e entrenadónan sigur di bolas. E otro deportenan ta keda un tiki difísil pasobra e orario pa trein ta un reto. Ku tempu e ta spera haña mas boluntario i mas hende pa pusha pa bai dilanti. I si nan por haña mas hende pa forma parti di dje, nan ta logra muchu mas. E tipo di aserkamentu akí ta trese kuné ku e “unified partner” ta siña di e otro persona ku ta esun ku e desabilidat intelektual. Junny a pone énfasis ku e kontakto entre e partner i e persona ku desabilidat intelektual no ta unu di un via so pero e ta di dos kaminda, un ta siña di otro. Ta dos di inkluí e grupo akí, bo ta yega hopi leu.
Kingdom Games na Kòrsou
Pa loke ta Kingdom Games, Junny a splika ku algun tempu pasá, tempu di Covid, nan a bin ku un proyekto na Corendon ku despues a lanta atenshon pa e weganan karibense bin Kòrsou. I awor, e ta bin Kòrsou hopi mas grandi i profeshonal. E deportenan ku lo bai tin ta futbòl, bolas, atletismo i landamentu. Bowling lo ta un evento sosial pasobra nan ke pa e otro islanan isla tambe tin Bowling pa asina por gar’é pa tin mas kompetensia. Nan ta stimulá pa bowling hasi su esfuersonan pasobra no tin bowling na weganan mundial. I tòg nan meresé segun Junny i p’esei e esfuerso aki. Kualke atleta no por trein so pero e ke trein pa un meta i di e forma akí nan ke logra pa por traha mas duru.
Nos ta bendishoná ku e fasilidatnan ku tin
Relashoná ku e fasilidatnan pa por trein, Junny a bisa ku nan ta hopi gradesido na FDDK pa pone e fasilidatnan. Pero loke ta nan reto ta e transporte. Mester tin esaki pa por trese e atleta ‘training’ pero e ta kostoso. E ta kere ku lo ta bon di por tin mas fasilidat i mas plamá na Kòrsou. Ku esaki Junny a pone énfasis ku pa loke e infrastruktura nan ta bendishoná. Bowling nan ke pa e kalidat subi pero nan ta kontentu di por usa SDK ku ta unu olímpiko, un bon stadion sigur kompará ku otro paisnan den Karibe.
Boluntario
Tantu Junny komo Roland a hasi apelashon riba personanan ku ke ta boluntario di Special Olympics. E úniko kondishon ta ku e persona mester ta “clean” i tambe ku ora e komprometé su mes, e por kumpli ku esaki. E trabou di boluntario pa e atletanan ku un desabilidat intelektual ta algu masha spesial di tur dos banda. Nan ta siña di bo i abo ta siña di nan.
