Jennifer Hypolite vise presidente ABVO; Jourandy Leito miembro direktiva ABVO
Sindikalismo ta empoderá miembronan
Formashon sindikal ta un di e tareanan hopi grandi di e sektor sindikal. Jennifer Hypolite i Jourandy Leito di sindikato ABVO ta papia riba e otro banda di sindikalismo, e parti di duna formashon i guia na no solamente miembronan pero tambe esnan ku no ta miembro. Esaki pa nos kita for di e persepshon ku ora tende sindikato ta wega òf problema. Sindikato tin muchu mas.
Jennifer komo sindikalista
Jennifer i Jourandy a konta nos na promé lugá kon bin nan a drenta sindikalismo. Serka Jennifer nos a komprondé ku e ta nasé sindikalista. Semper e ta sali pa su próhimo su koleganan na trabou, su rumannan den famia, e ta algu den dje. Tur hende ku konosé kaminda e tabata traha si yega serka dje e ta buska un solushon òf bai papia i buska moda di yuda. Jennifer tin 36 aña laborando na Ministerio di Hustisia i sigur 30 aña komo representante di e grupo di servisio. I e ta aktualmente vise presidente di ABVO. Esaki el a hasi despues di 30 aña komo representante di grupo di servisio., E trabou ta hopi pero e ta hasié ku smak. E ta purba no bai kas ku trabou den su kas, pero no semper ta logr’e. Nan ta famia, miembronan ta ABVO i ta bira manera bo famia.
Jourandy komo sindikalista
Jourandy di su parti a bisa ku ora el a drenta komo ámtenar el a tende ku sindikato ta eksistí. Pero tambe el a tende pa no drenta sindikato pasobra sindikato no ta hasi nada pa e hende, esei ta loke el a tende ora el a drenta komo trahadó den servisio di gobièrnu. Jourandy a skucha esei i e no a drenta sindikato mesora, te ora kosnan a kuminsá pasa. Kon ku bo hasi e kosnan ta kuminsá bin den bo direkshon i asina el a drenta sindikato pa e haña defensa riba su posishon hurídiko. Den esei e ta mira otronan tambe ta sufri bou di e área laboral, kosnan inhustu tabata sosodé i e ta kere ku mester wak un manera pa yuda den esaki. E tabatin eksperensia den loke el a pasa aden i e sa e kaminda. El a drenta sindikato komo miembro te dia nan a invit’é pa bai nan Konseho. El a skucha i mira i ora mester a skohe pa drenta Cas Commissie, un lider sindikal Calmes a bis’e komo el a studia sifra ta bon pa e drenta e komishon. Jourandy no tabata ke promé pero a bai e reto. E tabata miembro promé di Cas Commissie i despues vise presidente i despues presidente. Aki el a keda 9 aña. Despues tabatin otro Kongreso i nan a pidié pa drenta direktiva di ABVO. E echo ku el a drenta direktiva pa e mira di bèrdat ku sindikato no tin nada ta hasi pa hende. El a ripará ku sindikato i sigur ABVO ta hasi masha hopi pa miembronan. Pero el a ripará ku si no logra kisas 1 punto di e 10 puntonan, bo ta tende ku sindikato no a hasi nada. Jourandy a duna esei ku ehèmpel den negoshashon di dos kompania ku a bai den otro i den negoshashon di 10 punto, un no a logra. Ora a presentá e plan di kiko a sosodé i lo bai sigui sosodé i ku ta un punto no a logra i einan el a skucha ku ABVO no a hasi nada pa nan. ABVO tin hopi kos ta hasi pa miembronan. Nan ta drenta 7 or di mainta i sali te asta 9 or di anochi ku yen kos sea karta òf posishon hurídiko. E mes ta den sekretariado di formashon i e ta yuda otro sekretariadonan pa asina e miembro por haña su derechi. Un bia mas el a bisa ku no ta asina ku ABVO no ta hasi nada pero den negoshashon no ta tur kos bo ta haña.
Keho i disputa
Riba loke Jourandy a konta nos, su kolega Jennifer a splika ku hopi bia e miembro ta aserká ku den su mente kiko e ke, pero hopi bia no ta esei ta e mihó p’e. I ora splik’é den kua direkshon mester bai, tin ta komprondé, pero otro ta sali bai bisa ku ABVO no a logra nada pa nan. E vise presidente a sigui bisa riba e parti laboral ku tempu e tabata na Ministerio di Hustisia, e ta eksperensia e kosnan na trabou. E tabata den komishon di disiplina i ora e bai ABVO ta ku asuntunan di su ministerio e ta bai atendé. Pero awor ku e ta den direktiva di ABVO mes enkargá ku e e sekshon di Klachten en Geschil esta Keho i Disputa e ta mira ku tin hopi inhustisia ta tumando lugá. Tambe hopi intimidashon, kultura di miedu, no ta tene kuenta ku e hende su posishon hurídiko, hopi bullying, sexual harassment. Si bo laga sa ku bo ta den grupo di servisio ta kuminsá traha ku bo. Promé Jennifer no tabata sa di nan pero awor ku e ta den dje e ta sa di nan.
Sa bo derechi
I p’esei a kuminsá ku formashon segun Jourandy pasobra e miembronan hopi bia no sa su derechinan. I ora bo no sa bo derechi, e kultura di miedu ta dominá ora bo no sa ki ora papia i keda ketu. Por ehèmpel si e Landsbesluit no ta korekto, e miembro tin 30 dia pa bai den protesta. I tin miembro ta warda e 30dia pasa pa e reklamá. Esei ta pone e forsa di e miembro bira ménos i si e bai korte ta mustra ku e no ta atmisibel. E ta bira e ora ei negoshá i si e hende ku ta negoshá kuné no tin gana di wak e kos manera e ta pero ta bai loke tin den su mente ku pasobra e miembro ba sindikato ta kontra di dje e ta, e no ta bai logra masha. E mentalidat ei tin di sali for di e sistema sino ta keda biba un bida laboral asina ku inhustisia. I si e miembro via su sindikato bai minister ta pió ainda, pasobra esun ku tin di negoshá kuné ta hasié su enemigu, pasobra el a bai buska su derechi.
Doño trabou no gusta p’e trahadó bai sindikato
Jennifer a splika ku tambe por haña ku ta bai ku e miembro un reunion pa intermediá, esun na kabes di e negoshashon ta drei puntr’e ta dikon el a bai sindikato i dikon no a bin serka dje. Pero e trahadó ta den su derechi di bai sindikato òf bai e hefe. I si e hefe tabatin porta habrí lo a bai sera dje, pero ta intimidá e trahadó. Otro punto di preokupashon ta i ku ABVO ta eksperensiando ta ku e miembro ta bai korte i gana su kaso i ora mester ehekutá e sentensia pero e doño di trabou ta mustra ku e no ta ehekut’é. Asina nan ta mustra nan poder. Òf otro ora si e hende gana kaso ta bin bisa ku no tin konfiansa mas den dje.
Formashon
Loke ABVO ta hasiendo pa konsientisá e miembro riba su derechi Jourandy a splika ku nan ta duna hopi formashon den diferente ángulo di trabou i personal. Ta duna derechi di ámtenar manera LMA i lo sigui ku e prosedura i leinan ku ta duna derechinan di e trahadó. Pa esnan den sektor privá ta duna lei laboral, areglo laboral, lei empresarial, lei fiskal. I awor aki ta bai kuminsá ku e parti di finansa, kon traha un kuenta anual BKB (básiko) i kon pa lesa relato anual. Asina abase di formashon ABVO ta purba kita e miedu di e trahadó pa e sa ki momentu e tin di hasi tal kos i ki momentu no. Ora forma e miembro, e miedu lo kita pasobra e sa kiko e tin di hasi. Ora e no sa kiko e tin di hasi e tin miedu pasobra no sa kiko ta bai pasa. Tambe ta bai mustra e e miembresia ku ABVO tei p’e. Ta robes bisa ku sindikato no ta hasi nada. Awor ku Jourandy ta den direktiva e mes ta eksperensiá kon nan ta traha pa e miembronan. I e interes segun Jourandy ta hopi haltu pa e formashonnan aki.
Rehuvenese
UN reto ku nan ta eksperensiando ta e parti di rehuvenese. Nan ke e hóben, e profeshonal hóben. E hóben ku ta drenta awor ta pensa ku e no mester di sindikato i kiko ku pasa e mes por paga su sindikato te ora e hañ’e den e situashon. Tin bia promé dal e stap pa korte, ABVO por papia i negoshá i e miembro por haña su derechi. ABVO ta hasi hopi kos. Banda di formashon ta sali pa bo derechi. ABVO ta skucha e miembro i tin bia asta paga sikólogo pa e miembro. Tambe ta paga abogado. Nan ta reuní hopi ku ARBO pa si e miembro tin algu di malesa ku e no por traha òf ta keda sin haña gratifikashon pasobra e tabata malu, pero no ta buska pa sa dikon e miembro ei tabata malu. E kosnan ei no ta bon segun e miembronan sindikal.
Abvo no tei pa midi forsa
Sindikato ta keda un grupo di preshon i ta eksihí rèspèt pero ta sinti tin bia ku ta midi forsa ku nan. ABVO no tei pa midi forsa ni pa trese problema pero pa yega na solushon pa e miembro. Ora trese broyo i forsa finalmente ta e miembro ta perhudiká. Nan no ta traha asina pero nan ta traha pa yega na solushon pa e miembro i no hink’e mas den pèrtá. Si e miembro ta OK e servisio tambe ta OK. Tin miembro ku ta na sikólogo i a drei dor. Tin trahadó ku ta yega te kasi porta di trabou i no ke drenta pero nan ta obligá di bai pasobra nan tin kos di paga. I ta puntra tin bia kon ta bai hasi pa yuda e miembro aki pasobra e doño di trabou tambe mester aseptá su fayo. Asina tur dos ta krese pasobra e miembro ta bai traha mas mihó i e kompania ta krese. Sin trahadó no tin nada. Tin doño di trabou ta sinta wak e trahadó bai wc i bisa ku el a dura 8 minüt. Tin doño di trabou ta bisa “over my dead body”. I hopi bia e mesun hefe ei tabata den un situashon ku a bringa p’e i ora e yega na kabes e ta lubidá kiko e mes a pasa aden.
Kita miedu di e trahadó
E desafio di mas grandi pa ABVO ta inhustisia laboral. Por defendé e posishon hurídiko, por bai sinta papia ku e doño di trabou pero e kos ku mas ta bin dilanti ta e inhustisia. E hende tin derechi pero e doño di trabou no ke pa e hañ’e i e trahadó ta sufri. Tin hopi sufrimentu pero nan di ABVO ta wak e manera ku si no por atendé ku e doño di trabou ta bai atendé ku e trahadó dor di dun’e konosementu. Duna e trahadó e forsa pa e sa ki momentu e tin di aktua i evitá ku e landsbesluit ta hasi sin e por protestá. Empoderá e trahadó pa promé e bisa si òf no òf asta sakudí kabes e sa ta kiko e ta atendé kuné i kon atendé. Esei nan ta hasi dor di kita e miedu di e trahadó.
Ta basta awor, no mas inhustisia
E aña aki ABVO a kumpli 90 aña i nan tin un kampaña ku yama “Ta basta awor, no mas inhustisia”. E kampaña ta bai riba e parti di formashon, kua ta e parti mas esensial ku e trahadó mester. Tambe lo bai konsientisá henter pueblo di Kòrsou ku ta eksistí derechi di hende. Hopi bia ora drenta trabou ta haña e obligashon pero nunka ta bisa bo derechinan. Ta tende kiko por hasi i ki ora si òf no pero no ta pone e derechinan. I p’esei ta bai konsientisá e trahadó i e doño di trabou ku ta eksistí derechi tambe i siña para p’e. Tambe lo bai atendé parti di hende muhé, hasié fuerte pa ku intimidashon seksual. E hende muhé hopi bia ta pensa ku e no por hasi otro pasobra ta asina so e ta haña promoshon. E hende muhé mester ta mas fuerte, sali pa su derechi, pone su liña. Ta empoderá e hende muhé pa e para pa su prinsipionan.
Marka e diferensia
Konosementu i eksperensia ta marka e diferensia. Miembronan i trahadónan mester sa ku ta eksistí e parti di derechi i semper para p’e. Sa ki ora papia, aktua, ki ora keda ketu i kua akshon tuma, esei por hasié ora sa bo derechi. ABVO tin su kampaña di formashon pa fortifiká e trahadó pa e miedu no ta esun ku ta poderá mas pero e balor i kurashi pa para pa derechi.
