Clarinda CTB: No ta spera ku esei lo tin muchu impakto
WILLEMSTAD.-Relashoná ku e informe di departamentu di estado merikano ku ta duna konseho negativo pa biaha pa Kòrsou EXTRA a papia ku direktor interino di Ofisina di Turismo (CTB) sr. Hugo Clarinda. Den un promé reakshon Clarinda a splika ku CTB ta na altura di e konseho di CDC. Ta asina ku CDC ta wak e kantidat di kontagionan i den kaso di Kòrsou nos a pasa 500 kaba. Kòrsou ta na 604 kasonan aktivo i pa CDC nan ta wak kuantu kaso tin pa un poblashon di 100.000 habitante. Ta abase di esaki ku CDC a pone Kòrsou un bia mas den nivel 4 ku ta enserá e konseho pa no bia pa Kòrsou.
E sifra di kontagio na Kòrsou na e momentunan aki ta pone ku a pone Kòrsou un bia mas komo destinashon di rísiko haltu. E direktor interino a sigui splika ku te algun tempu pasá Kòrsou a pasa di kategoria 2 pa nivel 1 debí ku e kantidat tabata bahando hopi bon. CTB no ta muchu preokupá debí ku na mart pa mei tambe Kòrsou tabata den mesun posishon i despues e kantidat di kontagionan a baha te ku Kòrsou a yega nivel 1.
E parti mas importante ta ku den e tempu ku Kòrsou tabata na nivel 4 anteriormente e biahenan a sigui normal i p’esei CTB no ta kere ku mester evaluá kon ta bai ku e rekomendashon nobo aki. Ta bini aserka ku Merka no ta e merkado prinsipal. E situashon ta hopi diferente na momentu ku Ulanda lo pone Kòrsou tin kódigo oraño. Na e momentu ku Ulanda pone Kòrsou riba kódigo oraño ta nifiká ku tour-operators ta stòp di bende pakete. Di e forma ei nan ta minimalisá nan riesgo, pero esei si tin impakto grandi riba nos turismo i ekonomia.
Pa Ulanda ainda Kòrsou ta bon, manera e situashon ta e ta serio pero e ta bou di kontrol. E bakuna sigur a yuda den esaki. Awendia tur hende ku ta biaha sa ku mester test sea promé òf despues di e biahe.
