WILLEMSTAD.- Djasabra anochi a tuma lugá den Festival Center e konsierto organisá pa Fundashon JAG titulá ‘Carnival Village Concert’. Ounke e konsierto no a logra di atraé e kantidat di públiko ku e organisashon a spera mester bisa ku e presentashon di artistanan tabata na nivel.
‘DEN E BEMBE’ ta kere ku si e organisashon lo a evaluá bon i tuma konseho lo el a yega na e desishon di organisá un evento ku presentashon di bandanan lokal so. Sigur mirando ku pa e periodo di promoshon ku tabatin i tambe tumando na konsiderashon ku e dos atrakshonnan internashonal pa masha tempu no tabatin un éksito na radio lokal. E echo ku tabatin éksito ku Kassav, no ta nifiká ku trese Kevin Lyttle i Krosfyah lo a trese mesun resultado.
Djasabra tabata un fecha kaminda tabatin masha aktividat farandulero ku a pone ku e públiko ku bo por atraé tambe ta bira ménos, esei sigur ta hunga un ròl den temporada di Karnaval. ‘DEN E BEMBE’ un biaha mas ta duna su opinion pa loke ta trata e lei ku tin pa protehé temporada di fin di aña i tambe Karnaval ku fo’i dje promé aña no ta para fuerte pa loke ta trata su implementashon.
Ta importante bèrdat pa desaroyo ekonómiko bo mester tin aktividat di tur género pa tur tipo di públiko, pero esaki ta keda reflehá den asistensia na un aktividat di rekoudá fondo pa e organisadónan di Karnaval. Mester evaluá si riba dia ku tin aktividatnan relashoná ku temporada di Karnaval si ta laga otro organisadónan organisá evento ku ta kompetí direktamente òf indirektamente ku esun di Karnaval.
Pa bin bek riba e konsierto, pa nos ONE i Gentz a resultá e atrakshonnan di anochi, esaki ta bolbe enfatisá e pensamentu ku nos bandanan lokal mes por a atraé un públiko mas grandi.
ONE tabatin e trabou difísil pa habri e anochi, pero nan repertorio tabata bon hinka den otro i a bin ku Lele komo artista invitá i e tambe manera ta un tradishon a pone ambiente na final dje presentashon.
Gentz ta keda e banda ‘Hot’ di e temporada aki. E banda a presentá bon i ku Paul Welvaart komo artista invitá nan a pone un chèri riba e bolo i no papia mes di ‘Gentz Par’e !’ ku ta un kos serio ora ku esaki ta keda presentá. No solamente e públiko ta bira eufóriko, pero e músikonan mes ta drenta manera den un trans ku e muzik ku ta keda presentá.
Dongo su presentashon tabata bon, pero e mester a tene kuenta ku transmishon di tantu radio komo televishon, ta konosí ku Dongo su lenga i letra di kansionnan ta ‘pika’. Ir-Sais a kumpli ku su presentashon, pero a indiká durante di entrevista ku e ta sufriendo di kebrante di salu, pero a bin kumpli ku e públiko lokal.
Pa ‘DEN E BEMBE’ e artista ku a skor mas malu riba e anochi tabata Kevin Lyttle, su presentashon no a impreshoná. Krosfyah a presentá pa sera e anochi, pero bo ta mira ku e músikonan a kuminsá bira grandi i no tin mesun energia manera ántes durante di nan presentashon. E públiko a biba ku nan den e promé parti di presentashon pero despues ku nan kuminsá rèk nan presentashon, e públiko a kuminsá bai kas, loke sigur pa kualke artista no ta algu ku nan lo ke eksperensia.
Nos konseho na Fundashon JAG ta pa siguiente okashon, traha riba un konsierto di bandanan lokal mes i laga kada un bin demostrá kiko nan tin pa temporada di Karnaval. Si bo ke trese un artista internashonal, sòru pa esaki ta pega sigur na radio, pa bo por atraé un públiko grandi pa bo evento.
