WILLEMSTAD.- Djabièrnè último a tuma lugá un konsierto grátis interaktivo bou di direkshon di ‘The JJ Cool Creative Jazz Ensemble’. Ku mas o ménos 60 hóben e anochi tabata un éksito grandi.
Despues ku e banda a duna un presentashon di introdukshon i duna un splikashon riba músika Jazz a duna e hóbennan un oportunidat pa nan por a toka huntu ku e banda. Na final dje konsierto e hóbennan a risibí un sertifikado di partisipashon.
‘Children’s Museum Curaçao’ ta stimulá siñamentu interaktivo serka muchanan. E konsepto di ‘Interactive Jazz Concert – Look, Listen and Learn’ di JJ Cool Creative Jazz Ensemble ta kuadra perfektamente ku esaki.
E konsierto tin komo meta pa trese e hóbennan i nan mayornan den kontakto ku e músika kontemporáneo, smooth, Latin i Krioyo jazz. No solamente e hóbennan i nan mayornan ta skucha muzik, pero nan ta bai toka huntu ku e banda. E hóbennan a trese nan propio kitara, keyboard i tambú. Otro muchanan a hasi uso di nan man, bòternan bashí òf pida palu pa nan hasi muzik kuné.
Ounke lèsnan di muzik ta importante, pa nos di e museo e eksperensia di músika interaktivo kaminda tur hende ta sinti nan mes sigur pa purba, eksperimentá i eksperensia e desaroyo di músika serka e hóbennan masha importante, asina dirèktris, Esther de Sola-Pijl a indiká. ‘E anochi tabata un eksitoso i tur e hóbennan a haña oportunidat pa na un manera agradabel sera konosí ku diferente sorto di instrumènt i músika di jazz’.
‘Children’s Museum Curaçao’ ta gradisí ‘The JJ Cool Creative Jazz Ensemble’ i tambe e spònsernan ku ta hasi e konsierto posibel: Kas di Kultura, Fonds 21, Fonds voor Cultuurparticipatie i BankGiro Loterij Fonds.
