WILLEMSTAD.- Dia 26 di aprel próksimo Crisèn Schorea & su banda 8.40 lo presentá su produkshon ‘Morde Mi, Kome Mi’ na públiko den forma di un konsierto. Despues di a mir’é debutá e aña aki den Festival di Tumba ata awor bo oportunidat pa eksperensiá Crisen Schorea den su propio konsierto. Na novèmber 2018 el a finalisá e produkshon musikal ‘Morde Mi, Kome Mi’, ku ta konsistí di 9 piesa original na Papiamentu, i di kua tur teksto i melodia ta di su persona.
Djabièrnè 26 di aprel Crisèn lo presentá esakinan pero tambe algun piesa ku lo ta parti di su próksimo produkshon musikal. E ritmonan ta varia di balada, reggae, tambú, samba, montuno te merengue. Artistanan invitá ta Hershel Rosario, Pernell Saturnino, Willem Castillo Blanco Blankenburgh, Sharda Daryanani i Grupo D’Art.
E ‘Morde Mi, Kome Mi Concert’ lo tuma lugá dia 26 di aprel 2019, pa 8 or di anochi na Landhuis Klein Kwartier. Porta ta habri 7.30. Karchinan na balor di 30 florin ta optenibel na Mensing’s Caminada i serka Crisèn (5188229).
E disko kompakto ‘Morde mi , Kome mi’, ta disponibel via ITunes, Spotify, Amazon Music, CDbaby i mas. Tambe e ta optenibel den forma di cd na Mensing’s Caminada i serka Crisen Schorea.
