WILLEMSTAD.- Kòrsou lo tin ku warda un tiki mas p’e kombinashon di Los Compadres, Jose Alberto El Canario i Estrellas de Buena Vista. Glenn Camelia, ku un kurason pisá mester a tuma e desishon ku pa motibunan imprevisto, i fuera di alkanse mester posponé e konsierto planeá pa dia 9 di desèmber na Curaçao Airport Venue (Hato) pa selebrashon di 20 aña Los Compadres. “Nos ta hasi e partisipashon lamentabel aki kontra nos boluntat i ku sentimentunan miksto. Tur hende ta na haltura di nos seriedat i nos dedikashon ora nos ta organisá un evento. Pero ora bo ta organisá tipo di eventonan asin’aki, bo tin mayoria kos den bo man, pero no tur kos. En espesial e parti di e artistanan i nan presensia na Kòrsou ku ta dependé kompletamente di nan posibilidat pa biaha i ta presente riba e fecha ku a kumbiní ku nos. Nos a skohe pa no adaptá e programa i hasi esaki ku ménos artista ku loke nos a anunsiá, di manera ku nos ta preferá posponé e konsierto i bai pa un otro fecha ku lo ta despues di karnaval den luna di aprel 2024. Nos ta deliberando ku e artistanan riba e fecha eksakto”.
Esnan ku no ke warda e fecha nobo di e konsierto, por entregá nan karchi i risibí nan sèn bèk. Esaki ta posibel sea na e punto di benta òf instansia kaminda a kumpra e karchi òf serka e persona serka ken bo a kumpra e karchi. Esaki lo por entrante djaluna awor di 4.00 pa 6.00. Si bo a kumpra serka un persona direkto, e persona lo drenta den kontakto ku bo djaluna òf bo mes por tuma kontakto ku e persona. Su bo a kumpra mesa VIP, bo por bèl 685 0650 i hasi palabrashon kon pa sea haña e montante depositá riba bo kuenta òf risibí e montante en efektivo. Por lo demas tambe por semper bishitá djaluna awor di 4.00 pa 6.00 na ofisina na Janwe (dilanti misa / èks-Giro) i entregá bo karchi i risibí bo sèn. E organisashon ta konsiente ku tin hopi karchi bendí. Sinembargo, ta duna garantia ku esun ku ke su sèn bèk lo haña esaki.
