WILLEMSTAD.- Den su boletin ekonómiko pa luna di yüni, presidente di Banko Sentral di Kòrsou i St. Maarten (CBCS) sr. Richard Doornbosch a bisa ku un di e palabrashonnan ku Kòrsou i Sint Maarten a hasi ku Hulanda riba implementashon di un pakete di reforma, e asina yamá Landspakket, komo
kondishon pa por a risibí sosten di likides durante e pandemia di covid-19, tabata ku pa mas
tardá na 2023 mester yega na un presupuesto balansá.
CBCS ta rekonosé ku en bista di e mal estado di
finansa públiko di e paisnan, konsolidashon presupuestario ta algu indispensabel.
‘Sinembargo, mirando ku nos ta enfrentando un nivel mas haltu di insertidumbre, tin ku evaluá si e trayekto aktual di konsolidashon presupuestario ta realístiko. Awor ku preshon inflashonario ta oumentando, moderando e ritmo di rekuperashon ekonómiko, i e gobièrnunan ta haña nan ta hasi mas gastu, pa por ofresé sosten dirigí na e miembronan mas vulnerabel di komunidat,
konsolidashon presupuestario no mester bai a kosto di e proseso di rekuperashon,’ asina
sr. Doornbosch ta atvertí.
Mas bien, e paisnan lo mester traha riba un trayekto di konsolidashon riba término mediano ku ta kompensá e efektonan ku medidanan di ousteridat presupuestario tin riba kresementu ekonómiko,’ presidente di CBCS ta konsehá.
Di promé, mester reformá e sistemanan di kuido i di
penshun pa asina redusí nan preshon riba presupuesto di e paisnan. Di dos, mester fortifiká e
maneho finansiero di e gobièrnunan pa por aloká e rekursonan di gobièrnu na un manera mas
efisiente i efektivo.
Riba tereno di entrada, mester sigui hisa e nivel di kumplimentu ku impuesto pa asina amplia e base fiskal i distribuí e peso di impuesto na un manera mas hustu bou di e diferente partisipantenan den ekonomia. Sinembargo, mirando ku tur dos pais
ta enfrentando kapasidat limitá, tur e reformanan akí no por keda implementá den un aña so.
Den su Boletin Ekonómiko mas resien, CBCS ta rekomendá pa tur dos pais formulá un programa
di adaptashon presupuestario riba término mediano, ku ta inkluí tur e medidanan menshoná, pero
enfokando riba un plaso di kuater aña. ‘Mester basa e programa riba suposishon prudente tokante kresementu ekonómiko i ophetivo presupuestario, i e lo mester fiha prioridat bon definí pa término
mediano.
Ademas, den e fase di rekuperashon, e tèmpo ku kua lo implementá e adaptashonnan
presupuestario lo mester ta mará na un norma pa ku e kuota di debe en bes di na un regla di balansa presupuestario,’ Doornbosch ta splika.
E ta amplia bisando ku ‘te asina leu, eksperensia a mustra ku, na Kòrsou i Sint Maarten, e regla di balansa presupuestario no a kontribuí na bon finansa públiko ni na e proseso di toma di desishon, sino mas bien na maneho presupuestario prosíkliko.
‘E paisnan lo mester implementá medida pa aselerá rekuperashon ekonómiko i kontribuí na un
trayekto di rekuperashon mas rápido i duradero. E reformanan struktural palabrá den Landspakket
ta nesesario pa resolvé e defisiensianan di ekonomia pa loke ta trata e banda di oferta tantu na
Kòrsou komo na Sint Maarten,’ Doornbosch ta sigui splika. ‘Un di e reformanan importante ta
redukshon di prosedimentu atministrativo i red tape’ (burokrasia).
Den e kuadro aki un di e artíkulonan prinsipal di e Boletin Ekonómiko di yüni 2022 ta presentá e
resultadonan preliminar di un investigashon amplio ku CBCS a hasi riba e efektonan ku burokrasia
tin riba prestashon empresarial i kresementu ekonómiko na Kòrsou i Sint Maarten. Un evaluashon
inisial di e resultadonan ta indiká ku e kosto di burokrasia a bin ta oumentá tantu na Kòrsou komo na Sint Maarten, afektando prestashon di negoshi i efisiensia ekonómiko. Mirando esaki, tur dos
gobièrnu lo mester tuma medida pa kombatí burokrasia.
‘Fuera di e medidanan struktural, algu mas ku lo benefisiá e dos paisnan ta un oumento den
invershon públiko, ya ku den e dékada ku a pasa, e invershonnan di gobièrnu tabata poko. Den e
kuadro akí, ta rekomendabel pa bini ku un programa di invershon públiko pa término mediano ku
klaramente ta duna prioridat na proyekto ku un rendimentu ekonómiko i sosial haltu, i ku ta fiha
norma pa garantisá kalidat di e proyektonan i un alokashon efisiente di e rekursonan,’ presidente
di CBCS Doornbosch ta konkluí.

LAGA UN KOMENTARIO

Please enter your comment!
Please enter your name here