WILLEMSTAD.- Mester bini un investigashon profundo di parti Kontraloria General riba desishon pa habri e “huisartsenpost” (HAP) na su lokalidat aktual. Parlamentario pa partido Nashonal, Elvin Gerard ta kuestioná e desishon pa no a habri e HAP den Curaçao Medical Center (CMC) i e konsekuensianan finansiero ku esaki ta trese kuné pa pais.
E parlamentario ta kuestioná uso di fondonan públiko despues di a haña kontesta riba preguntanan ku el a hasi relashoná ku gastunan di HAP. Den e kontestanan ku Gerard a risibí minister di Javier Silvania a bisa ku a pone 4 mion florin disponibel pa HAP riba presupuesto 2024 i 4 mion florin pa 2025.
Gerard ta puntra pa kiko un suma grandi asina i ke sa ta tur e gastunan ta ku ta suma 4 mion florin pa aña. Tin un diskushon kontinuo riba e desishon di gabinete Pisas II pa no hasi uso di e fasilidat ku CMC a pone disponibel pa un HAP. Un di e motibunan ku Silvania a duna pa no habri e HAP den CMC ta pasobra e hür pa luna ta mas karu.
Manera presidente di e asosashon di dòkternan di kas (CHV), Elger Jacobus a indiká den media tin un punto ku e minister no ta menshoná, esta ku e hür di CMC ta inkluso tur fasilidat manera ekipo i remedi. Tambe Jacobus a bisa ku e HAP ta situá serka di e departamento di emergensia kaminda por hasi uso mesora di spesialistanan na warda di CMC den kaso di un emergensia.
Gerard tambe ta mustra, a base di informashon ku el a kompilá, ku e hür ku CMC ta kobra pa e HAP ta ménos ku 33 mil florin pa luna. Esaki ta pa e espasio ku ta 258 meter kuadrá i e espasio tabata spesialmente diseñá pa un HAP. Adishonalmente ta kobra 6.300 florin pa luna pa awa, koriente, limpiesa, seguridat stòk i uso di material.
Huntu tur kos lo a kosta pues 39 mil florin pa luna pa operashon di HAP den CMC. Gerard ta bisa ku pa aña esaki ta ménos ku 500 mil florin. Den e kuadro aki e parlamentario ke sa dikon mester a skohe un otro lokalidat ku ta kosta komunidat 4 mion florin pa aña, kaminda no ta yega na un koperashon óptimo ku hòspital pa garantisá mihó kuido pa pashèntnan.
Pa e motibu aki Gerard ta eksigí pa banda di un investigashon riba funshonamentu di HAP hasi un investigashon profundo tambe riba gastunan di HAP i na unda i pa ken 4 mion florin ku tin riba presupuesto ta bai.
Foto:
…Elvin Gerard…
