15 di novèmber a hasi 50 aña ku 12 dama a hasi historia na Kòrsou/Boneiru ora nan a bira e proménan ku a forma parti di kuerpo polisial, ku e tempu ei tabata solamente hende hòmber. 12 dama, di kual 11 di Kòrsou i 1 di Boneiru a subi avion pa bai studia na Politie Opleidingschool De Boskamp na Leusden Hulanda. Nan 12 a keda skohé for di un grupo di 600 solisitante di henter Antia. For di 600 a skohe 200 ku a pasa un tèst sikológiko pa despues sigui eksámennan médiko i na final a sigui un investigashon di nan bida, famia i bario. E 12 damanan ku a marka historia tabata Edna Sintiago di Rincon Bonaire huntu ku esnan di Kòrsou Astrid Phelipa di West Groot St. Joris, Chandra Zimmerman di Groot Davelaar, Carina Hugo di Marie Pampoen, Asmara Thode i Corrie Zieck di Steenrijk,  Orcelinda Dickens (qepd) di Penstraat, Mayda Muzo di Phlip, Ingrid Juliana ku Vivian Hansen di Buena Vista, Jeremy Quinland di Trai Seru, i Nydia Arvelo di Brievengat bieu. Nan a subi avion na 1971 i a regresá bèk Kòrsou komo polis na 1973. E siman aki Djasabra a papia ku 3 di e damanan aki; 1. Carina Rumay Hugo, ku a traha nèt 7 aña ku tabata eksigí pa nos a traha minimal. Pero el a bai pasobra el a kasa i a keda ‘eervol ontslagen’, meskos ku Corrie Hagemans Zieck i Astrid Phelipa. Mayda Capelle Muzo  i Nydia Hato Arvelo ku a traha 30 aña largu pa despues bai ku VUT.

Vivian Goeman Hansen i Asmara Thode ta parti di e 12 hendenan muhé ku 50 aña pasá a bira polis, hasiendo historia na Kòrsou. Di e grupo aki, nan dos a keda 40 aña den servisio. I tabata un plaser pa a tende nan konta nan eksperensia komo polis i kon nan ta sinta awor i mira e desaroyo.

 

Gana ménos

Vivian no kier a bira polis, den su kabes ta pa bira stewardess. Un dia el a yega skol, den su último klas di Mulo, un mener di hulandes a benta un ènvelòp riba su lèsenar. Ma puntra ta kiko esaki ta i ora el a habrié tabata un karta di solisitut pa polis. El a komprondé ku ta buskando hende muhé polis. E mener a bisa Vivian ku e ta haña ku Vivian tin tur e kualidatnan pa bira polis muhé. I esei Vivian a hasi i el a logra.  Despues di a bin Kòrsou bèk komo polis na 1973 Vivian a konta ku un limitashon ku el a hañ’é kuné i ku mesora el a traha riba dje ta ku e tabata hoofdagent trahando na Riffort. E tempu ei Aruba i Boneiru i St. Maarten ta manda nan hendenan bin studia pa polis na Kòrsou. Tabatin un ku a bini for di Aruba ku e rango di polis 1ste klasse i el a laga Vivian wak su salario slep i el a spanta. E polis di Aruba hende hòmber ei tabata gana muchu mas sèn ku Vivian ku tabatin henter un responsabilidat di un tim di polis kompleto. E kos aki a duel Vivian masha hopi i el a yama e tempu ei sra. Maria Liberia Peters kende despues a sòru regla pa e kosnan por bira pareu. Vivian ta konta tambe kon un bia e tabata riba patruya ku un polis hende hòmber i a drenta un melding di un pelea. E kompañero di dje ta bisa sentral ku e tin un hende muhé huntu kuné. Vivian a bisa ku el a rabia mashá pasobra ta su kustumber di bai tur pelea i tur kos i niun bia anteriormente el a eksperensiá algu asina.

 

M’a lanta ku polis den kas, ta kiko mas mi por a bira

Pa Asmara e motibu ku el a bira polis tabata unu masha fásil. Ku un sonrisa el a konta Djasabra ku el a lanta ku polis den kas, “ta ki otro mi por a bira”. Su tata defuntu tabata polis i el a lanta ku polis den kas, e ta mir’é tur dia ta bai trabou, riba warda e ta pasa kas ku outo di polis, nan ta para na kurá ta pidi tata pa sende alarma i zwaailicht, kosnan ku mucha ta gusta tende. For di e tempu ei el a bisa ku ora e bira grandi, e ta bira polis i el a hasié tambe. For di na skol tur hende tabata sa ku ta polis e kier a bira ora e bira grandi. Ora nan a kaba skol un amiga di Asmara, Magda Wijngaarde a bai traha den Fòrti i tabata sinta den edifisio ku komisario di polis i e amiga aki a yama Asmara i a informe ku a habri posibilidat pa hende muhé tambe bira polis. I siguiente dia Asmara a yena e formulario i duna su tata mes ku ta polis, pa e bai entregá e formulario aki . El a subi avion na 1971 i na 1973 a terminá ku estudio i bin Kòrsou bèk. Segun Asmara e kier a traha mesun trabou ku su tata ta traha normal komo polis. Pero mirando ku nan tabata e promé nan, e pioneronan, tabata manera kos ku mester a karga e polisnan aki riba kusinchi ku felpa pa nada no pasa nan. Esei a traha hopi riba nan. Asmara a bisa ku e kier a bira polis i ke traha meskos ku e hende hòmbernan. Ta esei ta polis. Pero tòg komo ta hende muhé nan ta, mester tene kuenta ku nan. I esei tabata algu fèrfelu pa Asmara. Asmara a bisa ku ora nan a bira polis i yega Kòrsou bèk, nan a haña un pistol otro for di loke e polisnan hòmber tabatin. Meskos ku ora di bai patruyá ku e polis hòmber i si tin bringamentu, e hendenan hòmber ta hiba nan komo hende muhé warda i pa bai e asistensia.

 

E kos mas desagradabel

Pa Vivian e kos di mas desagradabel den 40 aña komo polis, morto i entiero di koleganan ta e kos ku mas a hasi influensia riba dje. Tampoko e no ta gusta inhustisia. Asmara di su parti a bisa ku el a pasa hopi kos, dependé kon bo wak e kos si e ta desagradabel òf no, pero un kos ku el a haña laf ta ku na dos okashon, un biaha na reshèrshi i otro bia na polis Punda, e komo shef tabatin un hende hòmber bou di dje ku pa nada di mundu no ta tuma un òrdu di hende muhé. E ta haña ku tipo di hende asina ta eduká nan ta ku e machismo ei. Pa nada di mundu e persona tabata tuma nada di niun hende muhé. Asmara dado momentu mester a bai atendé e situashon aki ku hefenan mas haltu.  Asmara ta kòrda tempu e tabata na departamento di tráfiko i a mèldu un aksidente ku morto. Asmara ku un kolega a bai e aksidente ei. A resultá ku un mama tabata kore e yu den ‘stroller’ i e outo a dal e yu. “Einan bo ta sa ku bo ta kere ku polis bo ta ‘strong’, pero tin kosnan ku ta afektá bu i bo ta keda di fris i bo no por hasi nada nada mas”. E kos ei a afektá Asmara masha hopi mes ku e no por a sigui atendé e dalmentu ei mas tampoko.

 

Polis bèk

Riba e pregunta ku si nan tin di skohe den otro bida pa bira polis atrobe, Asmara a kontestá ku den su kaso e sigur sigur. Asmara a bisa ku den su kaso su tata ta polis, despues el a bira despues tur su rumannan a bira polis. Polis ta den su sanger segun Asmara. Den kaso di Vivian, el a bisa ku e tambe lo a bolbe bira polis. Den polis bo no por imaginá bu kuantu bo por logra. Tin por bira polis i mente ta den un direkshon pero den su kaso e tabata buska pa siña semper bai. El a haña oportunidat di desaroyá den polis enormemente. Vivian no sa ku si el a bai traha otro kos si e lo a desaroyá asina’ki. Tin bia papiando ku hende e ta sinti ku e por desviá, kombersá den tur direkshon i e no sa ku tur hende por hasi e kos ei. El a haña hopi oportunidat pa bai kursonan.

 

Kontròl i disiplina

Despues di 40 aña komo polis i 50 aña ku hende muhé por a bira polis, Vivian i Asmara a trese dilanti kiko nan tin gana di wak kambia den kuerpo. Pa Asmara e disiplina i tambe hefenan na kabes di kuerpo ku ta mantené e kontròl sosial riba koleganan. Esaki pasobra tempu nan a kuminsá komo polis tabata na Punda i ei den tin un spil kologá i riba e spil skibí “is uw tenue in orde”. Tur polis ku drenta warda di polis Punda outomátikamente tin di wak den e spil ei. E polis tin di wak den spil pa wak si su unifòrm ta den òrdu pa e por traha. E tipo di kosnan ei a pèrdè. E disiplina tambe ta laga di deseá.
“Nan ta yama nos chapo pero ounke kon moderno bo ta mester tin disiplina den e kuerpo i e kontròl sosial. Si tabatin kontròl sosial den kuerpo, hopi polis lo no a haña nan den baina manera awor aki. E kosnan ei mester bin bèk i mas fuerte. Pero pa haña e kosnan ei mester tin lidernan fuerte pará den nan sapatu pa nan sa kon nan tin di ehekutá nan”, Asmara a bisa. Vivian di su parti a bisa ku tabatin un temporada tempu nan a kuminsá komo polis, tabata pasa un lista rònt pa wak si karchi kùr a kaduká, reibeweis ta na òrdu. E polis ta un ehèmpel i no por ta ku e ta kontrolá hende riba kaya i e mes su papelnan no ta na òrdu. Vivian a menshoná ku tur loke ta trata esun ku mester ta un ehèmpel, tur e kosnan ei ta keda kontrolá. Si e kontròl ei tabat’ei, tin kosnan ku lo no a pasa segun Vivian.

 

Polis i mama

Tabata masha interesante pa a tende di Vivian i Asmara kon nan a eduká nan yunan. Siendo polis, bo tin un outoridat i kon ta hasi un diferensia ku e outoridat ei na kas. Asmara a splika nos ku el a lanta den kas ku su tata komo polis, e tabata manera un diktador na kas. Asmara a lanta su yunan ‘streng’, e tin dos yu, un hòmber i un muhé. “Mi ta kòrda ku mi tabata traha na reshèrshi, einan ta detené hende i bo tin di keda traha mas lat pa kaba kasonan. Un bia ma yega kas i ku beis, mi no ta kòrda kiko a pasa i mi a kuminsá zundra. Mi yu hòmber tabatin 15 pa 16 aña e tempu ei, ora mi a kaba di zundra el a bisa mi ku mami a bin ku beis di reshèrshi i mami no mester bah’é riba nos, no ta nos falta. Mi a para ketu ketu i nunka mas e kos ei a pasa mi. Ora el a papia, di un forma trankil, e ora ei e kos a drenta den mi”, Asmara a konta. Esei ta mustra ku e trabou di nan komo polis, yen departamentu, hopi preshon, sin ku bo sa bo ta kue problema di aki i hiba aya.

Vivian a konta nos ku tin bia su kasá ta pidié pa no dikta i asina e ta bin bei. E ta brasa su yunan, ora e brasa nan i pidi sòri pasobra kabes ta pisá ku hopi trabou. Pero ni maske esei e no a stòp i otro bia e ta bolbe hasié. Vivian a bisa ku e tabata purba pa no dikta pasobra inkonsientemente e tabata na kas manera ta ku polis e ta bezig. Su kasá konstantemente tabata hala su atenshon riba esei pero tòg el a sigui.

 

Antes tabata un orguyo pa bisa ku bo ta polis

Polis tin un funshon di ta un ehèmpel, pero lamentablemente esei a kai hopi. I p’esei tantu Vivian komo Asmara ta pone énfasis riba e kontròl sosial i e maneho di kuerpo riba e trahadónan. E kontròl ei ta laga hopi di deseá. Antes tabata un honor pa bisa un hende ku bo ta polis pero awendia bo no ke pa hende sa mes, mirando kuantu kos ta pasa i un tras di otro ku e polisnan di awendia. I ántes e hefenan mes tambe tabata un ehèmpel pa e kuerpo polisial. Mester bin ku e kontròl purá pa drecha e aktitut den kuerpo i pa polis haña bèk e nòmber ku e tabatin ántes.

 

Mensahe

Vivian; ke pa polisnan siña, studia, bai kurso, alsa bo mes. Ser un ehèmpel pa bo trahadónan, koleganan i pa pueblo.

Asmara; Sea honesto, ser íntegro, hasi loke mester hasi pa alsa e nòmber di e kuerpo bèk pasobra si e kuerpo kai, bo ta kai kuné. Ban drecha e nòmber di nos kuerpo polisial, tene pasenshi pasobra nos sa ku tin hopi problema den kuerpo, prinsipalmente ku nan posishon, perseverá pa nos yega kaminda nos tin di yega.

 

2 COMMENTS

  1. Hi there! This is my 1st comment here so
    I just wanted to give a quick shout out and tell you I truly enjoy reading through your posts.
    Can you suggest any other blogs/websites/forums that deal with the same subjects?
    Many thanks!

    Here is my web-site http://pagineradio.com/

LAGA UN KOMENTARIO

Please enter your comment!
Please enter your name here