WILLEMSTAD.- Negoshinan pariba i pabou di brùg a haña bishita ayera di Tim Multidisiplinario.
For di oranan tempran di mainta e Tim Multidisiplinario, a tene kontròl dirigí riba ladronisia di vehíkulo i piesa.
Bou di bandera di ‘Actiecentrum Ondermijning Curaçao’ (ACOC) i den estrecho kolaborashon ku Kuerpo Polisial Kòrsou (departamento di kriminalidat di vehíkulo) a hasi inspekshon multidisiplinario riba dos garashi. E kontròlnan akí ta un paso importante den e lucha kontra kriminalidat di vehíkulo i otro formanan di aktividatnan ilegal den e industria di outo.
E inspekshonnan, ku a tuma lugá djaweps mainta, 24 di òktober, a wòrdu realisá pa medio di un tim di vários servisio, entre nan representantenan di Inspekshon di GMN, MEO (Inspekshon), SVB, Stichting Belasting Accountantsbureau (SBAB), Aqualectra, i e ministerio di SOAW (Departamento di Inspekshon di Labor i Departamento di Seguridat) i Ruimtelijke Ordening en Planning (ROP). E kolaborashon aki ta demostrá e esfuersonan i kompromiso konhunto di vários instansia pa pone un fin na práktikanan ilegal den e sektor di outo na Kòrsou.
Durante e kontròlnan akí a investigá i inspekshoná vários aspekto, entre otro e legalidat di vehíkulonan i piesanan di outo, pèrmitnan, kumplimentu ku eksigensianan di seguridat pa empleadonan i mas. E kolaborashon entre e vários instansianan a sòru pa por a desplegá un rango amplio di ekspertisio i rekursonan pa realisá e inspekshonnan efektivamente.
ACOC i Departamento di Polis di Kòrsou ta pone énfasis riba e importansia di e kontròlnan integral akí i lo sigui realisá nan den futuro. ACOC ta un plataforma di kolaborashon ku ta kai bou di Ministerio di Hustisia i ta komprometé su mes na un aserkamentu integral i atministrativo pa kombatí krímen ku ta debilitá nos komunidat, den kua koperashon, efektividat i envolvimentu ta sentral.
Durante di e kontròl akí den e áreanan ariba menshoná a konstatá;
Ku a usa tereno di forma ilegal;
Ladronisia di koriente.
Na un di e garashinan a detené dos hòmber di nashonalidat venezolano ku no tabatin dokumentonan legal pa nan por ta pertenesé riba nos isla.
E tim ta partisipá ku e kontròlnan ta kontinuá i no solamente dirigí riba benta di piesa i outo pero lo kontrolá den tur área di negoshi pa determiná legalidat di esakinan i si ta kumpli ku tur e rekisitonan ku gobièrnu ta stipulá.
