WILLEMSTAD – Un team speshal ku ta konsistí di diferente instansia gubernamental a realisá kontrol na vários panaderia awe. Na por lo ménos un di e lugánan a hasi detenshon i Aqualectra mester a presentá pa un posibel konekshon ilegal di koriente.
Den e team tabatin entre otro Polis, DGC, MEO, BAB i SVB. Durante e operashon nan a bishitá diferente panaderia pa kontrolá tantu e situashon di e negoshi komo e personanan ku ta traha ei. Un di e promé lugánan kontrolá tabata un panaderia den bario di Gato. Durante e kontrol a konstatá ku e lugá mester di mas limpiesa. E responsabelnan a risibí instrukshon pa limpia e lugá i segun informashon ku EXTRA a risibí, a duna nan solamente un atvertensia.
Un situashon mas serio a presentá na un panaderia na Brazilweg den bario di Sta. Maria. E panaderia, ku ta spesialisá den produkshon di pan libanes, tabata den un kondishon ku a hala atenshon di e outoridatnan. Den e lugá tabatin vários kos for di ordu i sushedat. E team a hasi un kontrol amplio.
Durante e kontrol a surgi sospecho tambe di hòrtamentu di koriente. Personal di Aqualectra mester a presentá na e sitio pa kontrolá e instalashon i situashon di suministro di elektrisidat.
Na mes momento, outoridatnan a kontrolá dokumentonan di personanan presente. Segun informashon ku EXTRA a risibí, algun persona ku no por a demonstrá ku nan estadia na Kòrsou ta legal a ser detené. Sigur dos persona a keda detené na e panaderia aki i a tuma desishon mesora pa sera esaki te próksimo aviso.
E akshon di awe ta mustra ku e team interdepartamental ta poniendo atenshon atrobe no solamente riba e operashon di e negoshinan, pero tambe riba higiena, suministro di koriente, status legal di trahadónan i otro normanan ku mester ser kumplí.
EXTRA ta sigui pendiente di resultado di e kontrol i si lo sigui mas akshon.
