Kontrolnan di ‘Satis Est’ durante henter mardugá: dos detenshon

WILLEMSTAD – Den kuadro di ‘Satis Est’, polis a tene kontrolnan durante henter mardugá na diferente punto di Kòrsou. Un di e kontrolnan prinsipal tabata banda di warda di polis na Rio Canario mes i pa ta mas spesífiko kaminda e establesimentu di vários negoshi ta. A pone tur esnan presente forma un liña pa asina hasi e kontrol. Tabatin un presensia grandi di vehíkulo di polis na e sitio i a kontrolá tantu hende komo vehíkulonan. Segun informashon ku EXTRA a risibí, durante e kontrol aki a detené solamente un persona relashoná ku droga.

Polis tabatin patruyanan stashoná mas aleu tambe, spesialmente pa por interseptá outomobilistanan ku purba desviá òf hui for di e kontrol. Hustamente esaki tabata e kaso ya ku na dado momentu un Hyundai a pasa ku spit haltu. Un patruya a bai tras di e vehíkulo i finalmente a logra par’é banda di Mi Lucha. Durante e inspekshon no a haña nada partikular den e vehíkulo. E motibu pa polis a para e outo tabata prinsipalmente pa e manera ku e shofùr a pasa ku velosidat haltu.

Shofùr sin dokumentonan purba di hui

Den un otro insidente ayera, un shofùr latino ku segun informashon no tabatin ningun papel válido a purba hui for di polis den direkshon di Campo Alegre. Durante e persekushon, e shofùr a terminá aksidentá kontra e outo di polis ku tabata persiguié. E vehíkulo polisial a sufri bastante daño komo konsekuensia di e aksidente. Polis a detené e shofùr pa sigui ku investigashon.

EXTRA ta sigui pendiente di mas informashon tokante e kontrolnan.