Konvoi speshal pa transporte hendenan indokumentá

Sekretario estado ulandes: Esaki ta mundu riba su kabes!

GRONINGEN.-Estranheronan ku a yega Ulanda pidiendo asilo ta trese hopi molèster den transporte públiko. Komo ‘solushon’ pa e situashon aki gobièrnu ulandes ta pone un konvoi speshal ku ta transportá esnan ku ta pidi asilo di e sentro unda nan ta keda pa otro áreanan den Ter Apel na Groningen. Tin basta krítika di ulandesnan riba esaki i asta e sekretario di estado enkargá ku hustisia Harbers ta haña ku esaki ta ‘mundu riba su kabes’.

Resientemente a anunsiá ku ta pone un konvoi speshal pa transporte di hendenan ku ta buskando asilo. Di e forma aki ke evitá ku e komunidat ku ta move den transporte públiko ta sigui eksperensia molèster den transporte públiko regular.  Miembro di Tweede Kamer pa PVV, van Dijk ta di opinion ku di e forma aki a respondé na e bochincha i mal komportashon di e estranheronan ku un konvoi speshal pa nan so. Otro miembronan di Tweede Kamer ta di opinion ku mester atendé ku tur esnan ku ta kousa bochincha den transporte públiko entre Emmen i Ter Apel di otro forma.

Shofùrnan ta reklamá ku e hendenan ku ta pidiendo asilo na Ulanda no ke paga i ta kousa destrukshon banda di hopi molèster na otro pasaheronan ku a kustumbrá di move den tur trankilidat. E sekretario di estado ta bisa ku e konvoi lo no bai transportá e hendenan pòrnada, sinembargo no ta muchu kla kon lo bai regla e asuntu aki.

Mientrastantu na Kòrsou a bira konosí ku un médiko ulandes oropeo a anunsiá ku e ta pone su mes disponibel pa duna tratamentu na e grupo di hendenan indokumentá ku ta drenta nos pais. E médiko Janszen ta trahando pa habri un klínika ku ta duna kuido grátis na  grupo menshoná, speshalmente venesolanonan.

El a haña pèrmit kaba di gobièrnu di Kòrsou pa habri un klínika kaminda or duna kuido na hendenan na estado i mucha indokumentá. E fundashon di e médiko ta traha den estrecho koperashon ku UNHCR i organisashonnan lokal ku ta sali na vanguardia di hendenan indokumentá. Tur e gruponan a lanta e asina yamá ‘crowdfunding’ pa generá entrada.

 

SHARE

LEAVE A REPLY