Kor Guadalupana ta duna bèk

... Kor Guadalupana ...

WILLEMSTAD.- Kor Guadalupana a habri aña 2020 ku su proyekto “Kor Guadalupana ta duna bèk”, konforme su programa sosial i manera a primintí dia a organisá e konsierto/show “Back to the 80ties” den lunanan mei i yüni di 2019. Esaki a tuma lugá djasabra último ku un mainta ku grandinan. Durante di e mainta aki miembronan di Kor Guadalupana a deleitá grandinan di Huize Meer Zorg i Nos Welita ku músika i kanto. A kanta diferente kantika di ántes, religioso i moderno ku e grandinan, kombersá ku nan i te hasta a lòs e pianan un tiki ku e grandinan. Tambe tabatin algu di bebe i di kome pa e grandinan pa asina a hasi e selebrashon un totalidat. Na final Kor a opsekiá na gerensia di kada un di e kasnan un regalo na benefisio di e grandinan. Ku gran satisfakshon Kor Guadalupana por mira bèk riba un mainta di aktividat eksitoso i vooral e satisfakshon riba e karanan di e grandinan tabata notabel. Kor Guadalupana ta gradisí un biaha mas gerensia di Huize Meer Zorg i Nos Welita pa a duna nan e oportunidat pa por a pasa un mainta ku e grandinan i asina duna bèk na komunidat e loke ku komunidat a kontribuí kuné ku kompra di karchi pa e konsierto “Back to the 80ties”. E intenshon ta pa den e lunanan benidero Kor kontinuá ku mas di e aktividatnan aki na mas kas di grandi. Kor Guadalupana ta deseá henter pueblo di Kòrsou tur kos bon pa e aña 2020 i ku pas, bendishon i felisidat por reina den tur kas. Pa mas informashon di aktividatnan di Kor Guadalupana den 2020 por subi riba página di facebook di Kor Guadalupana o drenta den kontakto ku señor Gilbert Gruning ku ta e direktor general di via telefòn 510-6808.

SHARE

LEAVE A REPLY