Kor Maestronan Penshoná a la karga atrobe

WILLEMSTAD.- Si, ta bèrdat! Kor Maestronan Penshoná (KMP) a bira ya un konsepto indispensabel den nos komunidat! Unda ku bo bira ta riba nan presentashonnan hende ta fiha. For di nan fundashon na sèptèmber 2015, nan ta subi tarima pa di diessinku bia.
Ken por a kere ku un presentashon di un bia ku kantikanan di skol di ántes, lo a bin resultá den un distraishon fiho pa e grupo di adulto mayó, ku ora a yega e edat akí, merkado no tin mashá mas di ofresé na dje?
Karakter di e kor akí ta kuadra netamente ku nesesidat di e grupo spesífiko akí, esta: trese rekuerdonan dushi, duna oportunidat di skucha i kanta kansionnan preferí di ten ‘i nan ten, laga relahá den un ambiente dushi, bolbe topa ku amistat i konosínan di ántes i prinsipalmente sali i yega kas bèk na un ora aseptabel riba djadumingu atardi.
E bèrdatnan akí ta enkurashá Kor Maestronan Penshoná pa sigui kumpli i ta hasié ku hopi ánimo i amor tantu pa e públiko, komo pa e mes. P’esei ke bai deleitá kurasonnan ku ripitishon di e konsierto di desèmber pasá, kaminda den un ratu di ora tur karchi a kaba i mester a desapuntá hopi hende.
E konsierto akí titulá “Ban bèk ku pashon, eksperensiá kon kanto por tochi kurason” ta tuma lugá riba djadumingu 31 di mart, di 3.30 pa 6 or di atardi den oula di edifisio PWFC riba tereno di Refineria Isla na Post 5. Karchi ta kosta 30 florin i ta optenibel serka miembronan di kor i na Mensing’s Caminada. Ta warda tur amante di dushi kansionnan di ántes bin pasa un atardi agradabel huntu ku KMP.

SHARE

LEAVE A REPLY