WILLEMSTAD.- Ayera tardi a tuma lugá e último konsierto di Kor Maestronan Penshoná den ouditorio di PWFC. Despues di a deleitá komunidat durante di 11 aña ku nan kanto ku a toka asina tantu kurason a yega tempu pa nan pone un punto awor tras dje bunita proyekto aki.
KMP a kuminsá ku su promé konsierto na aña 2015, riba inisiativa di dft sr. Eric la Croes i Viola Ravenstein ku e meta pa duna homenahe na kantikanan di mucha i asina tene nan bibu, pa nan no bai pèrdí, i karga speransa ku skolnan lo sigui kanta nan.
Tabata un plaser pa presensiá e konsierto aki i mustra apresio i gratitut pa e trabou elokuente ku fundadó i demas dirigente di e kornan hubenil a hasi.
Riba potrètnan nos por apresiá kon un sala yen di públiko a disfrutá dje konsierto.
