Matthew Sophia ku medaya di oro riba 110 meter hurdle

729

WILLEMSTAD.- Matthew Sophia, kende tabata resien ganadó di e tòp premio di atleta di aña di Beto Adriana di FDOK, a logra gana medaya di oro durante CARIFTA Games 2022 na Jamaica riba e distansia di 110 meter hurdle, kaminda el a drenta e kareda final komo esun faborito. E di 49 edishon di CARIFTA Games a tuma lugá despues ku e último dos añanan e evento no a tuma lugá pa motibu di e pandemia di coronavirus. Sophia ta sa di gana medaya di oro ku un tempu di 13.74 sekònde, siguí na di dos lugá e atleta di Jamaica Demario Prince ku 13.88 sekònde i na di tres lugá Antoine Andrews di Bahamas ku 13.91 sekònde. E delegashon di Kòrsou a konsistí di dos atleta kual nan tabata Zaila Lemmens kende a partisipá den tiramentu di sper i Sophia kende a partisipá den karedanan di 100 meter i 110 meter hurdle. Lemmens kende ta partisipando pa promé bes den e evento, a logra di drecha su marka personal. Sophia riba distansia di 100 meter, a hasi su máksimo pero tabata mas bien mihó prepará pa 110 meter hurdle, kual e ta sup kampeon di U-20 na Oropa ku medaya di plata pa Hulanda na Estonia ku un tempu di 13.26 sekònde. Na yüni el a sa di baha su tempu na 13.15 sekònde, na momentu ei ku e tabata mihó di mundu komo hubenil. Matthew ta logra awor su di tres medaya di CARIFTA, despues ku na 2019 el a gana medaya di oro riba bulamentu haltu i bròns riba 110 meter hurdle. Un nota positivo ta ku djis despues di su kareda final, skolnan na Merka a bolbe aserk’é manera entre otro Louisiana State University, kua a ofresé “full scholarship” pa e bai na e skol. E delegashon ta bai yega djaweps awor, ounke Sophia mes ta sali Jamaica rumbo pa Merka, kaminda e lo bai hasi bishita na un otro universidat ku a ofresé scholarship. Riba kombinashon di fotonan por mira momentu ku Matthew ta logra su viktoria, momentu ku e ta selebrá, ora el a kaba di tuma su medaya i na momentu ku e ta huntu ku e delegashon ku a bai.

LAGA UN KOMENTARIO

Please enter your comment!
Please enter your name here