WILLEMSTAD.- Konseho di Minister di Reino a wanta un “aanwijzing” na direkshon di Gabinete Rhuggenaath. Esei ta e desishon ku a kai awe mainta na Ulanda den e órgano di reino. Último dianan tur kos tabata indiká ku Kòrsou lo a haña un instrukshon despues ku Kolegio di Supervishon Finansiero (Cft) a rekomendá Konseho di Minister di Reino pa duna Kòrsou un instrukshon pasobra segun Cft Kòrsou su gobièrnu no ta kumpli ku e medidanan severo ku e órgano a mustra riba dje. Cft ta insistí ku mester tuma e medidanan pa asina Kòrsou su gobièrnu por yega na un presupuesto balansa.
Konseho di Minister di Reino awe mainta a tuma desishon ku ta duna Kòrsou espasio di tempu, hustamente loke nos gobièrnu tabata pidi Cft i Ulanda. Aki un luna partidonan ta sigui deliberá riba e asuntu aki.
Manera ta konosí siman resientemente Parlamento di forma kasi unánime, ku eksepshon di Kòrsou di Nos Tur, a urgí premier Rhuggenaath i un delegashon chikitu di bai Ulanda pa presentá i defendé e posishon di Kòrsou relashoná ku e situashon tan delikado ku Kòrsou ta konfrontando.
Cft ta un órgano ku pa lei tei pa vigilá pa gobièrnu kumpli ku sierto norma i asina evitá ku Kòrsou ta bolbe kai den situashon finansiero desastroso di algun dékada pasá. Cft simplemente ta wak kiko e lei di reino ku ta trata finansa públiko ta stipulá Na otro banda Kòrsou pa mas ku 20 aña no a konosé un kresementu ekonómiko, banda di esei tin sirkunstansianan eksterno manera e situashon di Venezuela ku tambe ta afektá Kòrsou su situashon gravemente.
Konseho di Minister di Reino a tuma desishon ku ta wanta e instrukshon i duna espasio pa mas o ménos un luna.
