Kòrsou a registrá kaso positivo nobo di Covid-19

Gerstenbluth: Esaki ta e motibu pa kiko tin karentena obligatorio

WILLEMSTAD.- Kòrsou a kuminsá ku e proseso di de-eskalashon di medidanan kontra Covid-19. Entrante ayera nochi `toque de queda’ a kuminsá 12’or di anochi i a dura te 6’or di mainta, kontrali di e medida anterior di 9’or di anochi pa 6’or di mainta. Den e seshon di informashon awe dr. Izzy Gerstenbluth a anunsiá ku Kòrsou a registrá un kaso mas di hende ku ta infektá ku Covid-19. Ta trata di un persona ku a yega Kòrsou den kuadro di repatriashon i ta den karentena.

Gerstenbluth a splika ku a tèst 508 persona na Kòrsou te ainda, di kua 17 kaso positivo. Pues un kaso a bini aserka. Manera indiká ta trata di un persona ku tabata den karentena na un hotèl ku gobièrnu ta usando pa tene hendenan ku bini for di eksterior den karentena obligatorio. E persona a kuminsá haña síntoma i mesora a tèst e. Ya kaba e ta den isolashon na e hotèl. Tambe a hasi e investigashon di tur esnan ku e por a bin den kontakto kuné.

Dr. Izzy Gersenbluth

Tin 5 hende ku tambe e tim ta sigui nan pasonan. Tin 431 hende den karentena i ta monitor nan tur dia. Tin dos hende na marina ku ta bou di monitor, meskos tambe tin 12 persona di e base merikano FOL i tambe tin e barku krusero den haf ku 191 persona. Tur ta den karentena. E esfuersonan aki ta kosta hopi energia, hopi trabou i rekurso pero mester hasié pa evitá ku ta reintrodusí e vírus den e pais aki. Esaki ta e motibu pa kiko e karentena ta obligatorio i no liber na kas, pasobra a keda demostrá ku vários hende no ta tene nan mes na e regla.

Si habri Kòrsou i laga hende lokal i tur turista drenta esei tin su konsekuensianan direktamente riba e situashon den pais. Prinsipalmente Merka, kaminda tin hopi vírus i tin transishon enorme mester wak bon. Si habri pais awor aki nos ta kore riesgo ku grupo grandi di hende ta bini anto e kantidat ku lo ta positivo lo ta mas grandi i ora e vírus plama den komunidat serka hende lokal e ora ei transmishon ta plama i pone Kòrsou bèk na e situashon kaminda ta pone preshon enorme riba e kapasidat di salubridat. No tin espasio pa hasi fayo, asina Gerstenbluth a duna di konosé. Mas detaye den edishon di EXTRA.

 

SHARE

LEAVE A REPLY