Update:
EXTRA tabata na e sitio ainda relashoná ku e aksidente i nos por indiká ku nèt 10’or awe mainta e lusnan di tráfiko a kuminsá traha atrobe.
Aksidente fatal na krusada Schottegatweg/Bermudaweg
WILLEMSTAD.-Un ratu pasa polis i ambulans mester a bai ku urgensia na e krusada Schottegatweg west/Bermudaweg pa un aksidente di tráfiko hopi serio. EXTRA ta na e sitio i a tuma nota di un situashon di basta gravedat.
Ta trata di un aksidente kaminda tin 3 vehíkulo embolbi. Tin vários persona a resultá heridá. Personal di ambulans a chek un mucha hopi chikí ku tabata den un di e vehíkulonan i tambe otro persona. Tin shofùr di un e vehíkulonan ku a transportá pa ambulans miéntras ku un pasahero den un di e outonan si a fayesé na e sitio mes. Por a tuma nota ku ya kaba a tap e kurpa ku e paña blou. Informashon risibi na e sitio ta indiká ku tin algun dia kaba ku e lusnan di tráfiko na e krusada aki no ta funshonando. Polis a sera e área pa hasi e investigashon nesesario. Mas detaye den edishon di EXTRA.
