WILLEMSTAD.- Kòrsou ta konosé e promé morto den tráfiko. Awe mainta un aksidente serio a tuma lugá na Nijlweg/Frater Radulphusweg na unda dos outo di famia tabata enbolbí den un aksidente. Polis i brantwer tabata na e sitio pa yuda e víktimanan. Na un dado momento a registrá ku un di e persona enbolbí den e aksidente no a duna señal di bida mas.
Polis awe tardi a manda un komunikado di prensa:
WILLEMSTAD.- Djamars 21 di yanüari 2025 alrededor di 10.36’or, Sentral di Polis a risibí notifikaskon ku tin un aksidente di tráfiko ku a tuma lugá riba e krusada Frater Radulphusweg i Nijlweg i ku tin un persona ku ta gravemente heridá.
Mesora a dirigí un unidat polisial na e sitio. Na yegada di e unidat, el a topa ku un dama shofùr ku no tabata duna señal di bida.
For di investigashon preliminar ku polis a hasi, a resultá ku kousa di e aksidente tabata pa motibu di pasamentu den lus kòrá.
Alrededor di 11.35’or, dòkter di polis, na e sitio mes a konstatá morto di dama ku a fayesé a konsekuensia di heridanan ku el a sufri durante di e aksidente.
Ta trata di e dama Erquillia Isaias Lopez, nasé na Kòrsou dia 6 di yüli 1947.
Personal di Departamento di Tráfiko ta investigando e kaso.
