Kòrsou a gana di St. Lucia ku skor di 4-0
WILLEMSTAD.- Ayera den un Stadion Ergilio Hato kargá ku 7.715 fanátiko, Kòrsou a gana di St. Lucia ku skor di 4-0.Selekshon di Kòrsou a kontrolá e promé parti di e partido, pero no a konkretisá di esaki. Esaki mirando ku St. Lucia tabata limitá espasio den nan liña defensivo. Esaki a kambia unabes e promé gol a kai pa Kòrsou.
Gervane Kastaneer tabata e hòmber grandi ayera ora ku el a anotá un ‘hattrick’(tres gol), pa yuda selekshon di Kòrsou bai ku e viktoria.
E delantero di 28 aña a anotá na di 37. 52 i 57 minüt. Kastaneer a anotá sinku gol den su lastu dos weganan kontra St. Lucia.
Juninho Bacuna tambe a skor na di 74 minüt. Esaki tabata Juninho su di tres gol den último dos wega kontra St. Lucia.
Pa Kòrsou Kenji Gorré tambe a bria ku dos pase di gol. Miéntras ku Joshua Brenet i Livano Comenencia tambe a lusi i tabatin pase di gol.
Pa loke ta trata Comenencia te ainda, den praktikamente kada un wega ku el a hunga pa Kòrsou el a mustra sólido.
Ku e viktoria aki selekshon di Kòrsou ta logra yega pa promé biaha den historia, e último fase di klasifikashon pa Mundial.
E sorteo pa e fase final aki ta tuma lugá dia 12 di yüni awor.
Esaki ora repartí e 12 selekshon ku a klasifiká pa e fase final, den tres grupo di kuater ekipo.
Kada un selekshon den grupo lo topa otro dos biaha, pa asina totalisá seis wega.
E ganadó di e grupo lo klasifiká dirèkt pa Mundial 2026. Miéntras e dos mihó dos di lugá nan lo bai hunga ‘repechage’.
Djamars awor Kòrsou lo topa Haiti na Aruba, pa definí kua di nan dos lo keda na promé lugá den e grupo.
