Kompará ku Aruba i St. Maarten
WILLEMSTAD.- E kombatimentu di kriminalidat ku ta krusa frontera i kriminalidat ku ta mina den e parti Karibense di Reino Hulandes, ta un prioridat for di 2017. Entretantu a ehekutá investigashonnan penal grandi kontra (èks) polítikonan, kolaboradónan di kompanianan di gobièrnu i otronan envolví. Asina minister di Asuntunan Interno i Relashonnan den Reino, Judith Uitermark ta informá den kontestanan riba preguntanan di parlamento hulandes.
E investigashonnan penal ta tuma lugá bou di hurisdikshon di e ministernan di hustisia di e paisnan den Karibe. Pa e motibu aki e minister ta bisa ku e no por duna informashon riba investigashonnan individual. Hulanda for di 2017 ta duna sosten finansiero for di presupuesto di Ministerio di Asuntunan Interno i Relashonnan den Reino na 4 partner den e kadena hudisial pa kombatí kriminalidat ku ta mina, esta na RST (“Recherche Samenwerkingsteam”), Ministerio Públiko di Kòrsou, St, Maarten i islanan BES, Ministerio Públiko di Aruba i Korte Komun. Ku e medionan finansiero aki ta atraé kapasidat i ekspertonan pa hasi e investigashonnan.
Mas aleu Uitermark ta bisa ku mantenshon di lei i órden huntu ku refuerso di estado di derecho, kombatimentu di kriminalidat ku ta mina, i korupshon, ta primeramente un tarea di e paisnan den Karibe. Den e kuadro aki e minister no ta haña oportuno pa riba pregunta di parlamento hulandes duna un bista di kiko e paisnan mes ta hasi den e kuadro aki. Loke si e minister ta informá riba dje ta tur kolorashonnan ku a tuma lugá entre Hulanda i e paisnan outónomo riba tereno di alsa integridat.
For di 2018 St. Maarten tin su propio Kamber di Integridat ku ta aktivo. Konforme lei e kamber riba inisiativa propio òf riba petishon por duna konseho òf hasi proposishon riba maneho pa promové integridat en general na St. Maarten. Alabes e kamber por hasi investigashon. Na Aruba tambe tin un lei di integridat i for di 2021 tin un ofisina di integridat (“Bureau Integriteit Aruba”) ku ta aktivo.
E ofisina aki ta fungi entre otro komo un punto kaminda por mèldu aktonan kontra integridat, pero tambe e ofisina ta hasi investigashon riba violashon di integridat i ta konsehá riba maneho di integridat. Tantu e Kamber di Integridat di St. Maarten komo e Ofisina di Integridat Aruba ta pone enfoke krea konsientisashon. Na Kòrsou sinembargo ta plan pa lanta un ofisina di integridat, pero te ainda no tin un ofisina ku ta hasi e trabou.
Mas aleu e paisnan den Karibe tin areglonan riba tereno di finansiamentu di partidonan polítiko i sistema kon pa screen kandidatonan pa bira mandatario. Banda di esakinan e paisnan den Karibe ta aktivo for di 2021 riba tereno di medida gubernamental kontra kriminalidat ku ta mina. Ministerio di Asuntunan Interno i Relashonnan den Reino ta pone tur aña 1 mion euro na disposishon pa inisiativanan ku e paisnan ta tuma.
Asina ta dal pasonan pa yega na areglonan pa screen pèrmitnan ku ta otorgá ku e meta pa prevení práktikanan di labamentu di plaka. Banda di esaki a traha lasonan di koperashon pa aktua di forma multidisiplinario kontra kriminalidat ku ta mina i tambe a traha kampañanan di konsientisashon. Kuerponan polisial di e paisnan den Karibe tambe por hasi investigashon i Ministerionan Públiko por persiguí sospechosonan.
E retonan pa tur e isla- i paisnan den Karibe, den e kuadro aki, ta grandi. Geográfikamente esnan ta serka di Latino Amérika miéntras ku nan ta forma parti di Reino Hulandes, ta hasi e isla- i paisnan un blanko atraktivo pa kriminalnan. E echo ku ta trata di komunidatnan chikí tambe ta krea un reto pa un estado di derecho ku ta funshoná optimal.
Foto:
…Minister Judith Uitermark…
