Kòrsou menshoná en grande den kaso kontra El Chapo Guzman na New York

WILLEMSTAD.- Kòrsou ta menshoná en grande den e kaso ku a kuminsá e siman aki na New York kontra e narkotrafikante notorio mèksikano, Joaquin “El Chapo” Guzman. Ta resultá ku un di e kolaboradornan di e mèksikano ta detené na Kòrsou pendiente su ekstradishon pa Merka. Segun diferente publikashon di e siman aki, un kanades ku tin a apodo Russian Mike ta detené na Kòrsou for di kuminsamentu di aña. E ta bringando su ekstradishon. E tabatin un ròl importante den e imperio di El Chapo Guzman.

Na momentu ku ta preparando pa e “huisio di siglo” kontra e trafikante di droga di México, un kanades no masha konosí ta akusá di a yuda su imperio. Mykhaylo Koretskyy ku ta konosí komo Russian Mike i tambe Cobra ta akusá di e manda miónes di dòler na kokaina den direkshon pa Canada, via di su kontaktonan ku El Chapo. Dia 3 di yanüari e aña aki a detené Koretskyy di 43 aña na aeropuerto di Kòrsou na momentu ku el a baha for di un buelo for di Toronto (Canada). Outoridatnan na Kòrsou tabata den estado di alerta pa yegada di e kanades a base di un notifikashon speshal di Interpol. For di e tempu ei e ta bringando su ekstradishon pa Merka. Ya for di 2014 un korte na New York a akus’é di trafikashon di droga. Ta trata di Court for the Southern District of New York ku ta atendé e kaso aki.

Dokumentunan ku a publiká e siman aki na momentu ku a kuminsá ku e proseso di selekshon di e hurado ku lo atendé e kaso kontra Guzman, ta menshoná Koretskyy komo un kolaborador importante di e mèksikano. Anke ku a pone Koretskyy ofishalmente den e estado di akusashon dia 23 di yanüari 2014 ta e aña aki numa a duna informashon riba e akusashonnan. E kanades di orígen di Ukrania tabata biba na Toronto pa hopi tempu pero no a sali na kla te ku awor aki di kon a ward’é bandoná e pais pa despues detené na Kòrsou.

E dokumentu ta bisa ku Koretskyy ta akusá di a traha entre òktober 2008 i yanüari 2014 ku otro personanan pa asina kometé aktonan pafó di e hurisdikshon teritorial di Merka. Fuentenan na New York ta bisa ku outoridatnan merikano tin e sospecho ku tin un relashon di hopi aña entre Koretskyy, El Chapo i otronan. Segun e akusashonnan, Koretskyy a transportá lotenan grandi di droga pa Canada den trùknan di karga. Den e pruebanan tin entre otro telefònnan di tap i informashon ku trafikantenan ku ta koperando ku outoridatnan merikano a duna.

Na Kòrsou a konfirmá ku e ta detené i ku e ta bringando su ekstradishon. Den ki fase e proseso ei ta no ta masha kla. Dokumentunan na Merka ta bisa ku Koretskyy tin e mesun abogado ku El Chapo. Den e kuadro aki a menshoná abogado Jeffrey Lichtman ku no a kontestá diferente yamada pa duna un komentario. E abogado di Manhattan a haña fama pa defensa di e miembro di mafia John “Junior” Gotti ku no a haña kastigu no opstante akusashonnan serio.

A detené El Chapo i despues a ekstradit’é pa Merka na yanüari aña pasá. Na tur a detené na tres okashon i na dos okashon el a logra skapa. E alegashonnan ta kontené 17 punto pa trafikashon di droga, 14 bion dòler di ganashi kriminal i diferente asesinato den último dékadanan. E dokumentunan ta kubri 300 mil página i un gran kantidat di komunikashon grabá. Ta antisipá ku e lo haña bida largu.

 

SHARE

LEAVE A REPLY