Sennon Kastaneer
Sennon Kastaneer ta bèk na Hulanda pero ta sigui yuda studiantenan. El a studia na Hulanda i a regresá Kòrsou kaminda huntu ku su mama tabata manehá e ofisina di Hoge School Rotterdam aki na Kòrsou. Awor aki, Sennon ta bai Hulanda bèk pa e sigui desaroyá su mes. I tabata un plaser pa nos a papia ku Sennon Kastaneer ku por sierto awor aki ya ta na Hulanda.
Sigui bo kurason
Sennon a konta nos di Djasabra dikon el a skohe pa bai Hulanda bèk. Tur bia e ta bisa su studiantenan ku bo tin ku sigui bo kurason, bo mester hasi loke ku bo tin riba bo kurason. “Mi ta un persona ku gusta krese i desaroyá mi mes, pero a yega un momentu ku kaminda mi ta aki na Kòrsou no ta brinda mi e oportunidat mas. Pa e motibu aki mi a opta pa bai bèk Hulanda pa mi por sigui desaroyá”. Bo tin ku praktiká loke bo ta bisa, i Sennon ta sigui e konseho ku e mes ta duna su studiantenan. Sennon lo kontinuá den e kampo ku el a studia, ku ta pedagogia i coaching. Na Hulanda e lo bai fungi komo un coach di komportashon na un skol MBO.
Ta tempu pa sigui krese
Despues di a terminá su estudio el a regresá Kòrsou ku ta 13 aña pasá. “Mi lo bai sinti falta di Kòrsou pasó mi a siña hopi kos den e 13 añanan aki. Mi a krese komo persona pero ya ta tempu pa mi sigui krese”.
Guia na Kòrsou pa HSR
Sennon, huntu ku su mama Irene, ta manehá e ofisina di Hogeschool Rotterdam (HSR) aki na Kòrsou, unda nan ta duna guia grátis. Den diferente programa di Djasabra nos a papia di e ofisina, i hopi hende ainda no sa ku e ofisina ta ofresé guia grátis na hóbennan. E hóben ta sigui un trayekto na Kòrsou i ora e yega Hulanda e tin un parti mas ku e lo mester hasi di kual e lo risibí 2 punto di estudio. Tin diferente desaroyo ta tumando lugá den e ofisina. Bo por mira ku tin mas skol ke forma parti di e organisashon. Al final, e ta bai pa e studiante ta bon informá sea ku e ta keda Kòrsou òf bai den eksterior. Durante e tempu aki Irene, mama di Sennon, lo kontinuá ku e ofisina.
Prepará bon
Dikon ta importante pa e hóbennan ku ta bai studia den eksterior ta bon informá òf tin bon guia, esaki ta otro punto ku Sennon a elaborá riba dje. El a indiká ku e ta un di e promé studiantenan di Hogeschool Rotterdam i e tambe a risibí e guia aki. Hopi bia nos ta bai vakashon i nos ta kere ku nos konosé e pais. Pero ora bo yega komo studiante, bo ta ripará ku e sistema di edukashon ku a kustumbrá kuné, ta diferente. Ta importante pa kuminsá prepará bo mes den e áreanan aki. Nos abilidatnan suave no semper ta wòrdu eduká den skolnan. E abilidatnan aki ta importante pa ku bo estudio. Studia no ta solamente teoria, tin hopi otro kos ku ta hunga un ròl. Bo ta bai laga kas, bo famia, bo ta enkontrá emoshonnan nobo ku nos no a kustumbrá papia di dje. Esei ta e kosnan ku tambe mester tene den konsiderashon ora ta trata preparashon pa Hulanda”.
Abilidat suave
Ku abilidat suave Sennon ta referí na nos abilidatnan personal i sosial, por ehèmpel e manera kon nos ta komuniká ku otro. Nos no a siña kon ta komuniká korekto. Ora bo bai Hulanda ta un kultura kompletamente diferente i nan tin un manera spesífiko ku nan ta komuniká. Nan a kustumbrá di ta asertivo, i na Kòrsou nos no ta siña nos yunan pa ta asertivo. Pero danki Dios tiki tiki nos a kuminsá praktiká esaki. E puntonan aki ta importante pa bo preparashon. Por ehèmpel Sennon a menshoná ku e promé dia ora bo yega bo mester presentá bo mes, ken bo ta. Si nunka bo no a para ketu ken bo ta, e ta bira difísil pa bo realisá esaki. No ta importá si bo idioma no ta perfekto, simplemente bo mester tin konfiansa den bo mes. Sennon ta pensa ku abilidat suave mester wòrdu eduká tantu na kas komo na skol. Huntu e ta forma nos yunan, el a enfatisá.
Kuminsá un aña delantá
Otro siman nos tin un grupo grandi di hóben ta sali pa Hulanda pa sigui nan estudio. Pero kuantu tempu delantá e hóben ku ke bai studia na Hulanda mester kuminsá ku su preparashonnan. Sennon a bisa ku preferibel, por lo ménos 1 aña delantá, mas trempan mes si ta posibel. Por nota ku studiantenan ta skohe pa bin mas tempran serka nan. E studiante ta skohe un aña delantá pa asina ora e ta den su último aña di estudio e ta bai mas fásil i ta mihó prepará.
Pero pa esun ku no por hasié, Sennon ta sugirí pa kuminsá sigur un aña delantá.
E desafio di e idioma
Hóbennan ku ta bai sigui nan estudio den eksterior ta enfrentá desafionan. Sennon a menshoná, “Mi no ke ripití loke semper ta keda bisá ku ta idioma, pero dominio di e idioma hulandes ta un di e retonan mas grandi. Banda di esei mi por bisa e parti di ta asertivo. Ta importante pa sa kon buska yudansa i kon defendé bo mes ku rèspèt pa bo mes i otro. Tin bia esaki ta dependé di e persona mes. Ta importante pa konosé bo mes. Konosiendo bo mes bo por distinguí bo parti fuerte i bo parti ménos fuerte ku bo mester traha riba dje”.
Pone atenshon na hulandes
Hulanda ta ofresé vários estudio na ingles pero Sennon ta kere ku ounke esaki ta sosodé e studiantenan tin di pone atenshon tambe na Hulanda. Bo estudio por ta na ingles, pero e bibá ta na hulandes. Si bo ke bai kumpra un kilo di karni, bo mester por pidi esaki korektamente. Ta importante pa e studiantenan realisá ku estudio na ingles no nesesariamente ta nifiká e ta mas fásil. Hopi di nos studiantenan ta kere nan ta bon den ingles, pero tene na kuenta ku ingles na skol ta kompletamente diferente for di e ingles ku nos konosé den kaya.
Yuda kaminda ta posibel
Teniendo na kuenta ku Sennon tabata yuda den guia studiantenan di Kòrsou i otro islanan aki banda ku ta bai Hulanda, tabata interesante pa nos sa kiko e lo keda nifiká pa nos studiantenan. “Ora mi bai Hulanda, manera mi a menshoná, tin diferente desaroyo ku lo bai tuma lugá. Entre e paisnan den reino, mi tin bon kontakto pa por kontinuá e guia di studiantenan. Mi stima mi isla, mi kurason ta keda bati pa nos studiantenan, i mi ta haña importante pa yuda kaminda ta posibel”, Sennon a kontestá.
Ofisina di Hogeschool Rotterdam na Kòrsou
Pa loke ta e ofisina di Hogeschool Rotterdan aki na Kòrsou Sennon a indiká ku nan ta ofresé trayekto ku ta importante pa e studiante. E ofisina e yega na e tópikonan aki dor di papia ku studiantenan mes. Nan ta bai serka e studiantenan ku a pasa den trayekto i puntra nan kiko nan a haña importante i kiko ta loke nan a sinti falta di dje. Di e manera aki e ofisina ta adaptá e programa. Manera el a menshoná anterior, e parti di komunikashon ta inkluí komprondé ken bo ta komo persona i komo studiante. Kiko ta bo punto fuerte i kiko ta bo áreanan ménos fuerte? Kon bo ta komuniká ku bo koleganan di klas? Kon bo ta manda un e-mail pa un dosente? E bon notisia ta ku nos tin dosentenan hulandes ku ta duna lès di hulandes. Tin un parti di nos edukashon ku nos no ta para ketu na dje, hopi bia nos no ta para reflekshoná loke nos a pasa aden. Kiko a bai bon i kiko ta e lès ku nos por saka afó. Adishonal, e parti di presupuesto. E echo ku e ta bayendo Hulanda no ta nifiká ku e proyekto a terminá pero ku e lo sigui krese. Na e momento ei, mi tin entrada di otro banda. Mi lo sigui yuda tantu na Hulanda komo na Kòrsou.
Keda di focus
Sennon su konseho na nos studiantenan ku ta bai studia den eksterior ta: “Mi lo konsehá nan pa keda di focus riba nan meta, ni maske kon difísil e por mustra. Bo lo trompeká, bo lo kai pero ta krusial pa lanta i sigui pa dilanti. Tin hopi hende na Hulanda ku ta kla pa yuda boso, puntra pregunta i buska yudansa ora bo tin mester”, Sennon a menshoná.
Kas na Hulanda
Búskeda di kas ta keda un desafio grandi. Pa e studiantenan, no solamente esnan ku ta bai awor pero tambe esnan ku tin pensá di bai otro aña, kuminsá inskribí komo tin un lista largu di espera. Ta importante pa sa ku hopi lugá, den e promé aña ta ofresé e posibilidat di un kas ku yama “doorstroomwoning” i e siguiente aña nan mester buska nan propio kas. E studiante ta haña e oportunidat pa keda 1 aña den e kas i despues e lo mester sali, segun Sennon.
Mas posibilidat na Kòrsou pa esun ku kaba studia
Sennon a ripará ku e studiantenan ku ta terminá nan estudio na Hulanda a oumentá. Por ripará ku mas i mas nan ta mas interesá i a prepará nan mes mas mihó. Pero tambe bo ta ripará ku lamentablemente hopi di nan ta skohe pa keda Hulanda, i e mes tambe ta bai bèk. Ta un lástima, nos mester kuminsá duna mas oportunidat na e studiantenan di Kòrsou ya nan tambe por desaroyá. Bo no tin gana di bai laga bo pais pero ta yega un kaminda ku bo no por sigui krese.
