Algu grandi pa Kòrsou; Programa di Insentivo pa Pelíkula na Kòrsou
WILLEMSTAD.- Kòrsou awor tambe ta forma parti di e tratado di produkshon di televishon i pelíkula di Reino Ulanda/Canada. Esaki a keda anunsiá ayera pa medio di TJ Scott, evento organisá na Mondi Beach Club.
Manera TJ Scott a bisa den su diskurso, ta kasi dos anja pasa ku el a keda aserka pa Eloise van Wickeren kende ta “film commissioner” pa Curacao Film Office bou di e ministerio di desaroyo ekonómiko na Kòrsou. Eloise kier a wak e posibilidat pa Kòrsou por forma parti di e tratado di ko produkshon di pelíkula i televishon di Reino Ulandes/Canada ku ta data di 1989.
Einan segun TJ Scott e trabounan a kuminsá kana i a bin resultá ku Kòrsou ainda ta kualifiká komo pais outónomo den reino den e tratado.
Apesar di esaki,mester a haña mas prueba pa ta sigur ku ta asina i a sigui kana e kaminda di investigashon i finalmente na novèmber anja pasa a bin e respuesta di Canadian Telefilm ku “kue tratado ta apliká ofisialmente pa Kòrsou tambe i pa Boneiru, Saba,Sint Eustatius i Sint Maarten. Di e forma aki a rekonosé ku Kòrsou ta partisipante ofisial di e tratado di Ko Produkshon ku na su turno ta habri posibilidatnan grandi pa nos isla.
TJ Scott a menshoná e filmashonnan ilimitá di ko produkshonnan ulandes i kanades na Kòrsou, poniendo asina un banda e restrikshonnan di por graba solamente algun dia pafó di nan pais. Tambe e ta trese e oportunidat pa produkshonnan di pelíkula lokal por kolaborá direktamente ku partnernan kanades i ulandes hasiendo uso di e fondo di pelíkulanan ulandes (Netherlands Film Fund”.
I otro paso grandi segun TJ Scott ta insentivonan di filmashon ku gobièrnu ta ofresé pa produkshonnan ku ta keda hasi aki nan.
Eloise, ku vários hende na diferente ministerio, a traha duru durante e último dos aña riba kreashon di un Film Incentive pa Kòrsou.
Loke a ser desaroyá ta un plan pa un 26% All-Spend, kaminda sèn gastá riba sierto elemento spesífiko na e isla, inkluyendo labor.
Komo un direktor i produktor di pelíkula i televishon ku a filma proyekto rònt di mundu usando insentivo, TJ Scott a bisa ku e por sigurá ku si anunsiá ofisialmente e 26% All-Spend, pelíkula ta bin aki—i kuné, sèn. Hopi sèn!
E ta trese mas turista, krea kuponan di trabou i hopi mas.Tur hende ta benefisiá di e industria nobo aki i di e sèn ku ta gastá na e isla. Mas importante aún—e industria di pelíkula i televishon ta kreá oportunidat eksepshonal pa hubentut di Kòrsou.
I ya e moveshonnan a kuminsá. TJ Scott a menshoná ku su sosio di negoshi David Crocco i Cela Scott, ta den proseso di muda nan kompania grandi di post-produccion di zonido di Los Angeles pa Kòrsou. Nan lo kontratá i trein téknikonan di zonido for di e isla, pa traha riba nan proyekto merikano.
E sèn ku ta drenta pa ekonomia ta bini for di Merka. Esei ta un paso fundamental pa lansa nos ekonomia di pelíkula i krea un base pa kresementu den futuro.
Ora sineastanan bin Kòrsou, nan no ta salí solamente ku grabashonnan—nan ta salí ku historianan riba pelíkula. I e historianan ei ta inspirá bishitantenan di tur parti di mundu pa bini na nos isla, kreando un siklo di kresementu ekonómiko i interkambio kultural ku ta benefisiá tur hende.
“Nos mishon kolektivo ta” segun TJ Scott;
- Pa e sineastanan di Kòrsou: Esei ta bo momentu! Tuma bentaha di e oportunidat aki pa kolaborá, krea i kompartí bo kuentanan ku mundu.
- Pa nos gobièrnu; Siguí sostené i invertí den nos industria kreativo. E akuerdo aki ta solamente e kuminsamentu. Laga nos sigui usa e impakto positivo aki pa pone Kòrsou den e nivel mundial di pelíkula i televishon dor di aprobá e programa di insentivo ku ta riba mesa hopi tempu. Insentivo ta traha!
- Pa e medio di komunikashon: Yuda nos plama e notisia. Yuda splika kon e programa aki por transformá nos ekonomia.
