14 hóben a pas’é ku éksito  pero 13 tabata presente, ya ku un ta den eksterior. E hóbennan aki a sigui un kurso intensivo di ‘Tourist Guide & Hospitality’.

E kurso a keda inisiá aña pasá sèptèmber dor di Ofisina di Turismo di Kòrsou (CTB) den estrecho koperashon ku Reda Sosial, SOAW i One Curaçao e organisashon sertifiká di ‘Tourist Guide & Hospitality Training’ kual tabata enkargá ku e kurso.

Kuminsando ku un grupo hopi grandi, a bin kaba ku 14 hóben. E kurso no ta fásil i ta éksito un esfuerso grandi di e partisipantenan. I esnan ku a keda i pas’é ku éksito a demostrá esaki.

E programa di sertifikashon pa hóbennan entre 18 i 33 aña a pèrkurá pa e partisipantenan risibí un kurso intensivo di Guia Turístiko i Hospitalidat. Durante un seremonia spesial, e 13 graduadonan a risibí nan diploma for di man di  Minister di Desaroyo Ekonómiko Dr. Steven Martina i Minister di Desaroyo Sosial, Labor i Bienestar sr. Hensley Koeiman.

https://youtu.be/02V7sA50_1c

Diploma rekonosé

E hóbennan a risibí un diploma kual ta rekonosé pa World Federation of Tourist Guide Associations. Ademas di esaki, nan lo ta e promé ku lo haña un “Blue Badge” aprobá i rekonosé dor di CTB. Mayoria di e graduadonan a drenta sektor turístiko kaba i ta laborando komo guia turístiko. CTB di su banda tambe ta dunando nan e oportunidat pa traha komo guia turístiko pa gruponan ku ta bin for di eksterior.

Damaris Sambo a gradua ku e mihó puntuashon. Mas aleu a risibí nan diploma Anaïs Godfried Arundel, Berliza Jansen, Christy Mendes Brazao, Dewi Pomario, Ian de Windt, Jonathan Estanista, Quincy Carolus, Ray de Keyzer, Riangelo Jones, Ryan Quinland, Tyrone Brunken i Amaries-Anne Koeiman. Tambe nan a risibí un regalo ku tabata un oloshi i manera Ritzel Godfried di ofisina di turismo a enfatisá, pa asina nan kana nan sitanan na ora.

Ku e logro importante aki CTB i su partnernan ta deseá kada graduado hopi éksito den nan karera komo guia di turístiko i ta konta ku nan lo sa di bende Kòrsou di un manera ku ta inolvidabel pa nos bishitantenan. I keda pendiente ya ku pronto ta start ku e próksimo kurso di guia di turista. Segun EXTRA a komprondé esaki lo start na novèmber próksimo. Nos lo relatá e evento aki kompleto den nos edishon di EXTRA Djasabra i tambe digital.

 

Ritzel Godfried CTB

Durante di e anochi di entrega di diploma, den presensia di promé minister Rhuggenaath, ministernan Steven Martina i Hensley Koeiman, e mènedjer di desaroyo i produkto di CTB Ritzel Godfried a hiba palabra. El a menshoná ku ministernan Martina i Rhuggenaath a keda insistí ku mester alsa kalidat di turismo. E ta kòrda kon minister Rhuggenaath durante ku e tabata enkargá ku e kartera di turismo a insistí pa kuminsá ku kurso di guia di turista pa hisa e kalidat di turista. I asina e ministernan ku a sigui a keda insistí. I no tabatin nada mas importante ora a haña e minister di SOAW enkargá ku trabou pa duna e respaldo i di Reda Sosial ku a sostené e proyekto for di prinsipio. Hopi kos a pasa durante di kasi un aña. Dikon un proyekto ku mester a dura 6 luna a keda wanta pa un aña. e motibu dikon el a tarda ta pasobra nan a profundisá den e material pa e konosementu pa e guianan ku a kaba e kurso aki. No tabata sa pa kuminsá ku 75 i kaba ku 15. Si bo no por bo no por sigui asina sr. Godfried a bisa. I awor e grupo ku tin aki por Sali i traha. Ku nan kalidat nan a kuminsá haña trabou sin sikiera a haña nan diploma ainda. Nan ta profeshonalnan ku por duna servisio di kalidat. I p’esei sr. Godfried ta kontentu ku e apoyonan ku el a haña ku asina por a logra e proyekto aki. Kòrsou a bira riku na un kantidat di guia di turista profeshonal. I loke ta hasi mas spesial ta e Blue Badge ku e hóbennan a haña.

 

Reda Sosial ku plaser a kontribuí

Reda Sosial a pone su skoudernan bou di e proyekto di guia di turista. Na okashon di entrega di diploma e direktor di Reda Sosial sr. Bonifasia a enfatisá riba wowonan atento. E hóbennan aki ku a risibí nan diploma mester ta e wowonan ku mester mira kalidat i pèrkurá pa nos tur promové Kòrsou positivamente. Meskos ku kada lanthùis tin wowo na e parti mas haltu di e edifisio ku tabata sirbi ántes pa vigilá pa tur kos kana bon,. E hóbennan aki tambe mester vigilá pa e osnan kana bon na bienestar di e turista i di Kòrsou. E wowonan di lanthùis tambe tabata premirá peliger i e wowo di e hóbennan aki tambe mester hasié pa salvaguardá turismo. Ta nan a bira e reda di turista, kaminda ta fangu e bishitante i dun’é lo máksimo. Ta nan lo sirbi Kòrsou komo embahador sabiendo ku e isla aki mester di mas bendishon pa funshon. Ta nan ta trahando kaba. Na kuminsamentu di e kurso aki na sèptèmber 2017 sr. Bonifasia a sugirí ku esnan ku no por haña trabou figo pa kuminsá ku nan mes kompania. I awor aki sr. Bonifasia a komprondé ku hopi a tuma e sugerensia i a kuminsá nan propio kompania. Ku esaki Reda Sosial a kumpli ku su promesa i sostené e parti empresarial. “Primintí boso mes ku boso lo keda aktualisá boso mes pa asina mantené e Blue Badge. Reda Sosial ke gradisí tur ku a pone skouder huntu pa realisá e proyekto aki”, sr. Bonifasia a bisa.

 

Ku kantidat di kamber na kaminda, mester di guianan di turista

Minister Steven Martina a manda palabranan di pabien na e kursistanan. Tambe el a manda pabien na tur ku a aportá na e proseso aki entre nan CTB i Reda Sosial., Si wak bon ekonomia di Kòrsou i wak e sektor turístiko lo konkluí ku ta netamente e sektor aki ta krese positivamente ta desaroyando i esun ku mas perspektiva. Kòrsou ta bai tin mas airlift, diferente buelo adishonal i por a tuma nota algun dia pasa ku ta bin mas kamber. Si konta tur esakinan den próksimo 2 pa 3 aña lo tin por lo ménos 1000 te asta 2 mil kamber adishonal na Kòrsou. Den área turístiko mas turista i mas nesesidat di guia di turista. I esaki e hóbennan aki lo bai duna kontenido na dje i ku kalidat ku e Blue Badge. Ku esaki Kòrsou ta riba e bon kaminda ku logronan konkreto.

 

Konta historia ku smak

Minister Koeiman tambe ta masha orguyoso di e kursistanan aki, Turista ta un pilar masha importante i e turista ora e ta bai e ke bai ku algu. E parti mas importante ta e toke personal, e hende ku den su komunikashon ku e taksista, esun ku ta sirbi den hotèl i e guia di e turista ku ta mas bien un embahador pa e pais aki. Pa komuniká bon i duna e historia konta ku smak i amor pa logra hopi. Hendenan alegre hendenan ku duna servisio i ku Kòrsou tin dushi hende. Ta importante pa mira e meskla di yu di Kòrsou i ta importante pa sa ku Kòrsou ta mundu, aki ta papia vários idioma, riku na diferente nashonalidat i mester mustra ku Kòrsou ta habrí pa tur hende.

 

The sky is the limit”.

Apesar di tabatin otro kompromiso, promé minister Rhuggenaath a hasi akto di presensia na e okashon spesial aki. El a pidi pa para un ratu ketu na un nota positivo den tur e kosnan negativo ku ta bin dilanti. Hopi biaha e ta kuminsá na un soño. Sr. Rhuggenaath a menshoná ku un biaha bishitando Costa Rica, nan a mira kon nan propio hendenan ta haña trabou den e sektor turístiko i sertifiká. I minister Rhuggenaath a bisa ku mester hasi e kos ei. I semper el a bisa ku mester trese e kara di nos hóbennan ku tin bia no ta haña empleo fásilmente, dilanti. Asina riba konseho di Ritzel Godfried nan a bai e direkshon pa trein nos hóbennan pa ta profeshonalnan den guia di turista. Minister a pidi e hóbennan pa sigui invertí den konosementu, sigui den nan pashon i amor pa Kòrsou. Den e sektor turista no ta importá unda kuminsá pasobra aki ta “the sky is the limit”.

 

 

Emlyn Pietersz “One Curaçao”

Na òktober próksimo lo bai spera otro grupo pa e kurso di guia di turista. E siman aki e promé grupo a terminá, ku 14 hóben. No ta sin mas e grupo aki a haña nan diploma i kla. Nan tin di bai sigui kapasitá nan mes i mas ainda teniendo na kuenta ku nan ta e promé grupo ku a haña e Blue Badge. Emlyn Pietersz hopi orguyoso di su studiantenan tabata di fiesta. El a bisa Djasabra ku e grupo ku a terminá aki  lo mester pasa un eksámen otro aña ougùstùs i sigui pas’e tur aña di nobo meskos ku un EHBO, piloto stewardess. Nan lo sigui haña literatura te e proseso di pasa eksámen di nobo. Esaki at e promé grupo tambe ku ta haña e Blue Badge i e Kòrsou ta e promé mas den Karibe ku tin un grupo di guia di turista ku un Blue badge den saku. Emlyn a bisa ku e Blue Badge ta masha konosí na London, Paris, Italia, Gresia i Kòrsou ta e promé den Karibe.

 

Blue Badge mester sòru pa kalidat. Un di e maneranan pa kontrolá ta dor di laga e turista yena un formulario pero tambe teknologia ta asina avansá ku ta basta fásil tòg pa por kontrolá di e guianan aki ta hasiendo na trabou manera mester ta. Esnan ku sigui e kurso normalmente ta keda na altura di kambionan.

 

Kurso nobo guia di turista na òktober

E kurso nobo segun Emlyn ta kuminsá 18 di òktober. E inskripshonnan a kuminsá i esnan ku apliká lo mester pasa den screening. Por inskribí serka Emlyn na 527-1799 òf One Curaçao riba facebook.

 

Ku un sonrisa grandi Emlyn a bisa ku e ta asina orguyoso di e grupo aki. tabata un grupo piloto ku tabatin su desafionan. Un lider semper mester di un lider i den kada un di nan Emlyn a wak kon e por bira mihó lider pa e guia e parti aki. Emlyn a siña hopi di e grupo. El a bisa ora bo ta di sierto edat bo ta topa studiantenan hóben ku por yuda bu. E ta pone bu aktualisá bo mes ku hendenan ku ta kana asina avansá ku teknologia.

LAGA UN KOMENTARIO

Please enter your comment!
Please enter your name here