WILLEMSTAD.- Kòrsou a mantené su puesto nr. 76 riba ranking di FIFA, ku a keda publiká ayera. Mensualmente FIFA ta saka su ranking nobo tantu maskulino komo femenino kual ta basá riba resultado optené pa selekshonnan nashonal.
E ranking e luna’ki tambe ta keda liderá pa Bèlgika, siguí pa Fransia i Brazil. Remarkabel ta ku den e promé 10 paisnan apénas ta figura tres no-oropeo, kual nan ta Brazil (Nr. 3), Argentina (Nr. 8) i Uruguay (Nr. 9).Ta trata di tres pais di CONMEBOL, miéntras ku tur otro ta di Oropa.
Pa loke ta trata Kòrsou, e posishon nr 76 di último lunanan a keda mesun kos i esei apesar di e viktorianan resien riba Cuba (2-1) i St.Vincent & Grenadines (5-0). Pero bon pa apuntá aserka ku pa loke ta trata CONCACAF riba e ranking, Kòrsou ta keda superá pa solamente shete pais, kual nan ta: México, USA, Jamaica, Costa Rica, Honduras, El Salvador i Canada. Si tene kuenta ku tin 35 pais di CONCACAF riba ranking, e puesto number ocho entre e trintisinku paisnan sigur ta hopi bon.
E posishon nr 76 sigur ta unu remarkabel (2016: nr. 77) si tene kuenta ku na 2012 Kòrsou tabata na puesto nr. 177. Pues un kresementu formal despues di 2012, ku e meta pa Kòrsou sigui subi di posishon.

LAGA UN KOMENTARIO

Please enter your comment!
Please enter your name here