SYDNEY.- China ayera ku un gol den kada un mitar, a derota Kòrsou ku skor di 2-0. Un partido den kua selekshon di Kòrsou tabatin problema pa kompletá su pasenan, i alabes tabatin fayonan defensivo.
Selekshon di Kòrsou a kuminsá ayera ku un formashon di 4-2-3-1. Eloy Room manera semper del gol, Joshua Brenet, Juriën Gaari, Riechedly Bazoer i Sherel Floranus den defensa. Mientras komo e dos bolantenan kontroladó tabatin Leandro Bacuna i Livano Comenencia, i e bolante mas ofensivo tabata Juninho Bacuna. E sentro delantero titular ayera tabata Brandley Kuwas.
China tambe a kuminsá ku un 4-2-3-1, ku Xu Bin(Barnsley) komo e úniko hungadó ku ta hungando pafó di e pais.
E wega a kuminsá na momentu ku tabatin un yobida fuerte. Esaki kompaña ku un temperatura di 16°C i hopi bientu.
China a kuminsá e wega ki dos kòrner den e promé dos minütnan. E awa ku tabata kai tabata afektá ámbos ekipo, kaminda ku vários pase no tabata haña nan destinashon.
Selekshon di Kòrsou a pasa e promé 15 minüt di e partido, sin por a krea oportunidat di gol. Esaki pa motibu ku vários pase no tabata yega nan destinashon, debí na e echo ku China tabata bon posishoná riba tereno.
E promé tiru riba gol di Kòrsou, a bini na di 16 minüt danki na Juninho Bacuna. Un tiru ku a pasa na banda di e gol chines.
Na di 27 minüt China a haña un tiru liber indirèkt den área penal. E selekshon chines no a probechá, i e wega a empatá na sero.
Na di 29 minüt tabatin un momentu di peliger, ora Floranus a krusa un bala peligrosamente dilanti gol. Lamentablemente e kruse no a topa kabes di e atakantenan di Kòrsou.
Na di 32 minüt tabatin un momentu di spantu, ora Juninho Bacuna a sak den otro. Esaki despues di a dal den defensa chines. Djis un ratu despues e saminero a risibí un infrakshon duru atrobe.
E promé oportunidat di gol pa Kòrsou a bini na di 42 minüt, ora Juninho Bacuna a haña e bala den área penal. E saminero a skòp e bala haltu, i e wega a sigui empatá.
Nèt un ratu despues Sontje Hansen ábilmente a baha e bala den área penal pa Joshua Brenet, pero e defensa su tiru a keda blòkia pa un defensa chines.
China a pika dilanti nèt promé ku wega bai sosegá, ora ku ku China a haña e defensa di Kòrsou mal para den un situashon di bala para. Anto Shihao Wei a skor pa manda China ariba.
Tabata un promé tempu ku China a proponé hopi mas I tabata bon para riba tereno. Den parti final Kòrsou a logra krea algun oportunidat, pero e promé tempu no a bai bon den su totalidat pa e ‘Blue Wave’.
E di dos mitar a kuminsá ku kuater kambio pa selekshon di Kòrsou.
Tahith Chong, Jearl Margaritha, Jeremy Antonisse i Gervane Kastaneer a drenta na lugá di Juninho Bacuna, Sontje Hansen, Kenji Gorré i Brandley Kuwas respektivamente.
China a amplia su bentaha na di 59 minüt, esaki ora Sherel Floranus su despeho, a kai na pia di Yuning Zhang. E delantero chines no a pordoná j mesora a depositá e bala den gol.
Na di 62 minüt dos kambio mas a bini pa selekshon di Kòrsou. Tyrese Noslin a drenta pa Brenet, miéntras Roshon van Eijma a subi na lugá di Bazoer.
Kòrsou tabatin oportunidat di kòrta e bentaha di China na di 70 minüt, ora ku un tiru di Noslin a pasa serka di e gol chines.
Den di dos mitar a sigui ku diferente pase malu di selekshon di Kòrsou.
Na di 80 minüt tabatin atrobe dos kambio pa selekshon di Kòrsou. Esaki ora ku Godfried Roemeratoe i Kevin Felida a drenta na lugá di Livano Comenencia i Leandro Bacuna.
E wega a finalisá asina den un viktoria di 2-0 pa e selekshon chines, ku pa gran parti di e partido tabata e mihó selekshon riba tereno.
Selekshon di Kòrsou lo ta bèk den akshon djamars 4:10 di mardugá(ora lokal na Kòrsou), ora nan topa selekshon di Australia.
