Kòrsou ta saka empate 1-1 na Port-Au-Prince

...Kipernan Eloy Room (r) i Zeus de la Paz (d) huntu ku trainer di kiper Etienne Stomp ta rekordá Jarzinho Pieter...

PORT-AU-PRINCE.- Sontje Hooi un biaha mas a skor e gol pa trese legria den e ekipo nashonal di Kòrsou ku ayera na Port-Au-Prince a saka un empate di 1-1 kontra di Haiti. Un empate importante ku ta posishoná Kòrsou ku 4 punto den Grupo D di CONCACAF Nations League-A. E partido ayera nochi tabata bastante pareu i te hasta na ámbos banda a krea diferente oportunidat pa anotá.

Ku banderanan na mitar, na memoria di Jarzinho Pieter, i tambe un momento di silensio promé ku e partido, e ambiente den Stade Sylvio Cator tabata unu di fiesta ku e públiko animando su ekipo pa un viktoria. I en bèrdat nan a haña motibu pa selebrá na momento ku Pierrot na di 15 minüt di wega ta habri e skor. Un hugada poko konfuso pa defensa den área penal a kulminá ku un tiru ku tabata for di alkanse pa Eloy Room.

E gol, sinembargo, no a desanimá Kòrsou ku tabata hungando un bon wega. Miéntras ku na tur dos banda a sigui ataká, e gol di empate ta bin kai na di 41 minüt na momento ku e kueru ta keda hungá riba ala robes i ta bòltu esaki dilanti di gol kaminda Hooi ta tek aden sorprendiendo e kiper haitiano.

Den di dos tempu tur dos ekipo ta yega hopi serka un posibel di dos gol, pero kada bes tabata e respektivo kiper ku ta impedí esei.

Kòrsou tabatin 11 tiru den e partido: 4 di Sontje Hooi, 3 di Rangelo Janga, 2 di Kuwas, 1 di Juninho Bacuna i 1 di Kenji Gorré.

Kòrsou tabatin 282 pase, di kua 236 korekto. Haiti tabatin 256, di kua 222 korekto..

Ku e resultado aki, Kòrsou ta yega na 4 punto i Haiti ta kue su promé. Dianan 10 i 13 di òktober próksimo lo tin e kompromisonan entre Costa Rica i Haiti. Despues di esei, dianan 14 i 17 di novèmber ta toka na Kòrsou pa enfrentá Costa Rica. 

…E delegashon kompleto despues di partido. E ánimo pa selebrá e empate no tabata presente…

…Kuerpo tékniko i médiko durante interpretashon di himno…

…Kenji Gorré…

…Cheese Camelia rekordando Jarzinho Pieter…

…Públiko haitiano den tribuna di Stade Sylvio Cator…

…Brandley Kuwas…

 

…Roli Bonevacia…

…Juninho Bacuna…

…Banderanan hisá na mitar den stadion na Port-Au-Prince…

…Kuwas i Juninho Bacuna reparando pa kobra tiru liber…

…Sontje Hooi a bolbe demostrá su balor den selekshon nashonal di Kòrsou…

SHARE

LEAVE A REPLY