Kòrsou ta sali riba bon pia ganando di Haiti: 1-0

September 9, 2019

CONCACAF Nations League

WILLEMSTAD.- Kòrsou djasabra último a konosé un bon komienso den CONCACAF Nations League Grupo D ku viktoria di 1-0 riba Haiti. Un partido ku a tuma lugá den Stadion Ergilio Hato i ku a konta ku un asistensia públiko ku sigur a yega den kareda di 10.000 fanátiko.

E partido a resultá unu ku dos ekipo hopi pareu na otro. Den komienso di wega Haiti a sali pone preshon riba e defensa di Kòrsou i asta a yega hopi serka ora nan a anotá un gol pa medio di e hungadó Frantzdey Pierrot, pero esaki a keda anulá na momentu ku e asistente di liña Christian Ramirez, di Honduras, hisa su bandera i mustra e rèfri kostarisense Keylor Herrera riba posishon adelantá. Despues djei Kòrsou poko poko pero sigur a kue e dominio riba e partido i tabata hunga hopi kordiná den medio kampo ku rumannan Bacuna i tambe Jeremy De Nooijer hasiendo un gran trabou. Sinembargo e partido a kana yega haftaim ku skor 0-0.

…Selekshon nashonal di Haiti ku a kai vensí 1-0. Mañan lo hunga e di dos partido na e kapital haitiano…

Den e komplementario Kòrsou a regresá muchu mas konfiá i mandando ku bientu na fabor tabata ataká Haiti sin miedu. Reangelo Janga na algun okashon a hunga briante i a pone diferente bala bon riba pia di su kompañeronan, pero e defensa i e kiper di Haiti ta logra skapa nan ekipo na último ora. Finalmente na di 69 minüt Elson “Sontje” Hooi, e mucha di Buena Vista ku ta hunga pa ADO Den Haag na Hulanda, ta anotá un biaha mas pa nos selekshon pika dilanti 1-0. Tabata un bunita gol, kaminda e hugada a kuminsá serka Bradley Kuwas ku den un toke ta duna Leandro Bacuna kende na su turno ta pone pa su ruman Juninho Bacuna ku ta abilitá Sontje Hooi. Esaki ku su pia robes ta lastra e bala den huki pabou pa e bala bai drumi den nèt. Aki e muchanan di Kòrsou a bira mas loko i kier a buska mas gol, ora Roly Bonevacia i Jafar Arias a drenta wega. Haiti sigur no por a hasi nada mas kontra dje defensa lokal ku tabata hopi bon posishoná. Mester menshoná sigur e bon trabou di kiper Eloy Room. Despues di 4 minüt adishonal e rèfri Keylor Herrera a flùit pa último biaha den e partido i Kòrsou su hungadó a bula na laira pa selebrá e viktoria huntu ku nos fanátikonan.

E di dos partido lo ta mayan, djamars, na Port-Au-Prince.

Otro resultadonan

Otro resultadonan di Liga A di Nations League ta komo siguiente:

Grupo A: Canada 6, Cuba 0

Grupo B: Bermuda 1, Panamá 4

Grupo C: Trinidad & Tobago 1, Martinique 1

KU FOTONAN