Kòrsou ta un isla inkreibel

233

…Otro luna Margy Bond ta kumpli su promé aña na Kòrsou komo kònsùl general di Merka. Margy tin mas di 25 aña di eksperensia den departamento di estado tantu na Merka mes komo representando e pais den eksterior. El a representá Merka na diferente parti di mundu manera na Afrika, Afganistan, Mexico City, Madrid. I  for di yanüari 2022 e ta stashoná na Kòrsou, kumpliendo asina otro luna su promé aña. Konsulado Merikano ku ta keda nèt na bahada di brùg Juliana direkshon pa ost di Kòrsou ta hasi muchu mas ku loke ta den nos bista esta atendé Visa. Nan tin diferente proyekto ku ta envolví komunidat i ku ta na bienestar di e poblashon.

Un aña di amistat

I nos a sinta ku Margy Bond i el a duna un bista kuantu kos nan ta hasi einan. Un di e proyektonan ku sigur a hala nos atenshon ta e proyekto dominó. Margy a bisa ku e aña aki tabata unu inkreibel. Tabata un bunita aña di amistat, kaminda el a siña hopi i a gosa di e aña i purba hasi kosnan bon huntu ku gobièrnu di e isla. Nunka promé Margy a bishitá Kòrsou. E ta gusta naturalesa, laman, e mes ta sambuyá ku el a kuminsá praktiká na Saudi Arabia i p’esei ta algu spesial pa e ta na un lugá ku e por gosa di e naturalesa riba tera i bou di laman.

 

Atraé invershonista merikano

Konsulado ta envolví den kantidat di área; un di esnan prinsipal segun sra. Bond i ku nan ta aki na Kòrsou ta pa yuda e siudadanonan merikano ku ta biba na e isla. Esei ta un di nan responsabilidatnan prinsipal i ta loke kongreso ke pa nan hasi, esta kuido di e merikano ku ta den eksterior. Un di e prioridatnan ta ku nan ta traha i kooperá ku Wardakosta i trafikashon di droga i ilegalidat. Nan ta eksitoso riba e área ei pa kombatí kriminalidat. Otro punto di atenshon ta atraé invershonistanan pa Kòrsou. Nan lo ke mira mas invershonista merikano na Kòrsou i den e otro islanan. Nan ke mira e invershonnan ei den loke ta di importansia pa e isla manera e kambionan di klima, energia renovabel. E aña  aki nan a traha riba promové un akuerdo entre gobièrnu di Aruba, Kòrsou pa e kompania merikano Eagle por trese LNG (gas) pa nos islanan. I esei ta un ehèmpel ku nan ta konsentrá ariba esta pa trese e invershonista merikano i no kualke invershonista segun sra. Bond pero e invershonista ku ta kontinuá ku e interes den prosperidat ekonómiko i e benefisio pa tur hende na e islanan aki.

Hóbennan profeshonal

E otro punto di konsentrashon ku konsulado merikano ta pone atenshon ariba ta e relashon di hende ku hende i e ta nifiká hopi entre otro interkambio kultural, interkambio sientífiko. Pero tambe nan ta hasi interkambionan edukashon i den profeshonalnan hóben. I un di nan inisiativanan prinsipal ta e Young Leaders òf the Americas Inisiative i aña pasá 4 hóben profeshonal a bai Merka pa  e interkambio aki i nan a partner ku organisashonnan i empresanan merikano kaminda nan ta interkambiá ku otro i asina nan por ekspandé nan konosementu empresarial komo profeshonalnan hóben.

 

Skol na ingles

Otro punto tambe di interes segun Margy Bond ku nan ta bai lansa otro aña ta un skol ingles ku ta bai den konhunto ku St. Antonius School. E ta kuminsá ku 2 klas di lushi i ta sigui subi tur aña, siguiendo ku lushi, i promé klas di skol básiko, despues asina ta sigui bai. I di e forma aki tiki tiki e skol ta sigui desaroyá den ingles ku e kuríkulo ku nan di konsulado merikano ta desaroyá ku edukadónan ku konosé e isla aki, ku a bin aki pa konosé e isla spesífikamente ku su historia i kultura. No ta un kuríkulo merikano ku ta hinká den skol pero ta un kuríkulo diseñá spesial pa Kòrsou i ofresé na ingles. Na yanüari lo bai papia mas di dje segun Margy Bond.

Envolví i duna bèk

I komo parti di e komunidat ku konsulado merikano ta pone hopi atenshon riba dje, kònsùl merikano sra. Bond a bisa ku ta importante pa ta envolví den i ku komunidat i duna bèk na e hendenan. I semper nan ta buska moda di hasi obranan karitativo den kuadro di limpiesa, mantenshon. No ta asina ku nan ta djis sinta mei mei di e kuater murayanan di konsulado merikano, pero nan ke ta den e komunidat i yuda hende mas ku nan por.  Entre otro nan a hasi donashon di artíkulonan di skol ku nan a hasi entrega di dje na diferente skol na Kòrsou i esaki a sosodé ku e kooperashon di Forward Operating Location. Nan ta papia ku e maestronan pa sa kiko ta e nesesidatnan i ta purba traha spesífikamente riba e nesesidatnan ei. I nan a hasi donashon di mas di 10 mil florin na e artíkulonan spesífiko ku e skolnan aki tabatin mester. I banda di e proyektonan ei nan ta hasi trabounan di mantenshon na skolnan i sentronan di bario. Sra. Bond mes a bai ku Kunukuman i a yuda ku trabounan di limpiesa.

 

Edifisio moderno

I sigur loke ta halando atenshon den direkshon di konsulado merikano último lunanan ta e konstrukshon gigantesko na kaminda di e edifisio nobo pa konsulado merikano. Sra. Bond a splika ku ta un invershon di 250 mion dòler i ta keda konstruí pegá ku Roosevelt House. Konstrukshon di e edifisio nobo aki lo generá sigur 300 kupo di trabou i ora e edifisio ta kla tambe e personal di konsulado lo keda ku 2 te 3 bia mas tantu ku e ta aktualmente. Sra. Bond a bisa ku no ta trata di merikanonan ku lo yega e kuponan di trabou na konsulado merikano pero ku hende lokal. E edifisio ta diseñá pa un kompania di arkitekto ku a gana award respektivamente Kieran Timberlake ku a gana e rekonosementu komo arkitekto aña pasá na Merka. Nan a diseñá e embahada merikano na London.

Konstrukshon

Pa tur ku ke ta envolví den e proyekto aki, dia 10 di yanüari awor na Renaissance Hotel lo tin un dia habrí pa 2.45 or di atardi. Ta un oportunidat pa tur ku ta interesá den e konstrukshon. Einan lo topa esnan ku ta hasi nan ofertanan den e proyekto. Despues lo selekshoná esun ku gana e oferta i e kontratista mayó aki di mes ta bai tin mester di hopi sup kontratista. Konsekuentemente ta un oportunidat úniko segun sra. Bond pa por topa ku otro konstrukshonnan. Nan ke pa hendenan di Kòrsou ta envolví den e konstrukshon. E konstrukshon lo kuminsá sèptèmber 2023 i lo tuma un 3 pa 4 aña promé e ta kla. E ta sumamente bunita i moderno i ku ta kuadra ku herensia mundial di Unesco.

 

Orange Economy

Pa loke ta 2023 sra. Bond a bisa ku nan proyekto prinsipal ta e skol na ingles. Di otro banda  e ke sa kiko mas nan por hasi pa invertí den Orange Economy. Hendenan na Kòrsou tin talento i ta úniko den arte i músika. I mester tin forma pa ta mas envolví den e Orange Economy i mas posibilidat pa invershonistanan merikano bin Kòrsou.

 

E amistat di dominó

Dia Margy a yega Kòrsou su tim tabata sa ku e ta pone hopi atenshon riba relashon i amistat. E ke konosé hende i pa tin amistatnan. I no tin mihó forma pa konosé hende ku ta pa medio di wega i asina a kuminsá ku e amistat di dominó. E ta regalá dominó na bishitantenan ku e topa. E aña aki dia 4 di yüli tabatin un kompetensia di dominó i nan a rekoudá fondo pa aktonan karitativo. E weganan di dominó a siñ’é hopi, a lag’é konosé e hende di Kòrsou mas i mas. Dia el a kuminsá hung’é el a pensa ku ta djis un wega i e ta simpel. Pero tiki tiki el a pasa dor di algun bon guia i nan a siñ’é ku e tin di konta i strategia. Ta un wega masha dushi i nan tin diferente mesa di dominó. E ta un wega ku tur hende por hung’é.

Bon Pasku i bon aña nobo

I finalmente Margy Bond a yama danki na tur pa e tremendo aña ku e tin tras di lomba aki. E ta eksitante pa su añanan riba e isla i ta deseá tur hende Bon Pasku i Felis aña nobo.

 

 

LAGA UN KOMENTARIO

Please enter your comment!
Please enter your name here