WILLIAMSPORT.- Curaçao Little League por ta orguyoso ku Williamsport a skohe selekshon di Kòrsou pa habri e desfile di ekiponan durante dje parada di Williamsport World Series 2019. Nos muchanan tabata realmente kontentu i a demostrá esei tambe segun ku nan tabata pasa riba e karosa di Kampionnan di Karibe den kayanan di e siudat Williamsport.
Un kantidat di fanátiko tabata riba kaya pa apoyá tur ekipo ku ta partisipá kuminsando awe den e serie mundial pa mucha ku semper tin hopi atenshon rònt mundu.
District Administrator di Curaçao Little League Urni Floran, a splika ku nos ekipo mester sali gana Oustralia awe mèrdia 1 or. Si nos gana, nos siguiente wega lo ta djadumingu awor. E sistema ku Williamsport ta hunga ta dòbel eliminashon, pues mester sali gana nos weganan.
…Urni Floran; District Administrator di Curaçao Little League…
Pa loke ta e parada mes, Floran a keda impreshoná mirando kuantu aplouso nos muchanan a risibí di e públiko kant’i kaya. Riba e pregunta kiko esaki por nifiká pa Kòrsou, sr. Floran a bisa ku Kòrsou a marka historia na Williamsport bayendo 8 biaha siguí den e Serie Mundial aki i konkistá 1 título mundial i tambe un sup kampionato. No ta pòrnada ku na 2014 ora ku Little league a kumpli 75 aña a invitá nos selekshon ku na 2004 a titulá kampion pa nan por tabata presente pa un homenahe speshal. Den e selekshon ei tabatin entre otro Carlos Pineda, Jurickshon Profar i Jonathan Schoop. Floran ta konvensí ku nos ekipo lo saka kara e aña aki, un ekipo ku lo por bira un batata duru ta e ekipo di sur Korea ku semper ta duna bataya. Pero nos muchanan ta bon motivá i bon prepará.
Eksito na nos kampionnan di Karibe i laga nos komo pueblo manda un vibrashon positivo pa nos muchanan ku lo sali awe mèrdia 1 or kontra Oustralia ku probablemente Jurdrick Profar riba montíkulo.
…Un ambiente festivo durante dje parada…
