Kòrsou tin hopi talento i den futbòl tambe
Dencho Narcisio i Justin Tyrol ta dos hóben yu di Kòrsou ku ta forma parti di Feyenoord Camp ku ta tuma lugá di 8 pa 12 di yüli awor. Esaki ta e oportunidat pa habri porta pa talentonan di Kòrsou ku tambe por logra realisá nan soño den e deporte di futbòl. Den entrevista ku Djasabra nan a konta kiko por spera den e Camp di otro siman. Tur e dos hóbennan aki a kuminsá na Merka, nan a studia einan i a bai terminá nan estudio i kontinuá ku nan karera deportivo na Hulanda.
Coach profeshonal
Dencho Narcisio ta konta kon su mayornan a pone den beisbòl ora e tabata basta yòn. Pero despues di algun tempu el a bisa nan ku beisbòl no ta su kos. E ta para muchu ketu i e tin hopi energia i asina a bai hunga bala. Promé el a bai Victory Boys i despues den Skèrpènè. Tur su coachnan semper a bis’é ku e tin talento, semper e tabata kai den selekshonnan nashonal. Dencho a bai wega di reino i einan el a keda di di skout kaminda el a yega Hulanda i a bai hunga den Sparta. Despues el a sigui tambe pa Merka kaminda el a hunga bala. Einan el a hunga den e di dos divishon i despues Dencho a disidí di bai Hulanda bèk i sigui ku su estudio den deporte. Deporte ta su “uitlaat klep” manera e mes ta bisa. Deporte a dun’é hopi i e ke duna bèk na su komunidat den deporte. Den futbòl Dencho a hunga bala for di 7 aña ku ta mas di 20 aña pasá. I ku 21 aña el a stòp di hunga bala i ku 21 aña el a kuminsá komo Coach. El a kuminsá coach den un klup amatùr i despues a bai profeshonal i awor aki e tin 5 aña den Feyenoord. El a coach U9 pa 2 aña, U 10 pa 2 aña i próksimamente e lo bai coach U 11. Total Dencho tin 8 aña ta coach profeshonal na Hulanda.
Casa, e posibilidat pa tur hóben
Banda di ta traha pa Feyenoord den siman komo su trabou, Dencho tin su mes skol di futbòl Casa ku kual e ke habri porta pa e muchanan amatùr ku ke haña lès di un profeshonal. Tambe e ke duna nan dal e paso di sali di amatùr pa bai profeshonal. E nòmber Casa ta pasobra e ke ta un kas pa tur mucha, sin importá nan pasado pero e ke simplemente yuda nan.
“Mi promé regalo tabata un bala di futbòl”
Justin Tyrol tin 4 aña na Hulanda miéntras el a kuminsá hunga futbòl mes hopi chikí. El a hunga na Kòrsou te ku su 17 aña ora el a bai sigui studia na Merka kaminda el a hunga 1 aña pero a stòp pa dediká na skol. I den banda e tabata hasi algu di futbòl. El a sigui pa Hulanda den klup amatùr pa 2 aña i awor e tin 3 aña na Feyenoor. Justin a bisa ku e proseso a kana hopi lihé ku e mes no por a imaginá. El a studia tambe maneho di deporte na Tampa Florida. I awor aki e ta yuda Dencho tambe den su skol Casa. Pero Justin ta dip den deporte i asta ku su ruman na Kòrsou nan tin negoshi Pelota i nan tin vèlt tambe na Saliña. Justin a bisa ku tur loke e hasi tin di aber ku deporte; ta manera drumi i soña ku deporte. Pa Justin, deporte ta algu ku asta enemigunan ta bira amigu ku otro den hasiendo deporte. E ta trese union i por mira esei ora tin weganan deportivo. Pa Justin futbòl ta e deporte di mas grandi. E ta kòrda ku su promé regalo serka su tata tabata un bala di futbòl. Hopi di su famia ta den deporte i den su kaso el a lanta den kas ku futbòl.
Si logra, Feyenoord lo keda bin
Tin posibilidat pa nos hóbennan sigui krese den futbòl? Dencho ta kere ku esei ta sin mas. Nan sa kuantu potensial tin na Kòrsou i ti hopi talento aki. P’esei nan a bin Kòrsou ku Feyenoord. E ta kòrda ku nan a drenta den ofisina di Feyenoord i a bisa ku semper ta manda nan Canada i tur otro pais pero nan ke bai Kòrsou. Nan ta kere ku na Kòrsou tin hopi talento. Nan a biba aki i tin talento pa no sobra. Wak kiko ta pasando den beisbòl i e ta kere ku por logra esei ku futbòl tambe. I p’esei nan a haña e chèns teniendo na kuenta ku nan tin konfiansa den e kampamentu aki. I si e funshoná, Feyenoord lo firma un kòntrakt pa nan sigui bin Kòrsou. Esaki no solamente pa e Camp pero tambe pa skout un te dos hungadó pa aña i bai Hulanda ku nan pa mira si nan lo logra. Dencho a bisa ku nan a habri e porta i e hungadónan mes ta e yabi pa e porta keda habri. Tin un persona di e departamento internashonal ku lo bin Kòrsou ku lo wak e kalidat di entrenadónan i e kampamentu aki pa mira si tin potensial pa nan por sigui organisá esaki pa sigur e próksimo 10 aña i piku na Kòrsou. Dencho a bisa ku meskos ku Andrew Jones ta e ‘role model’ den beisbòl na Kòrsou, i den futbòl tambe mester tin ‘role model’ di Kòrsou ku ta bai habri porta pa e generashonnan próksimo mira ku nan tambe por logra i bira profeshonal kisas na Hulanda. I nan ke habri e porta pa e promé hungadó bira esaki. Nan ke habri e porta, guia e hóbennan di Kòrsou kon pa bira profeshonal na Hulanda.
Kombiná estilo nort Amérika i oropeo
Tantu Dencho komo Justin a hunga futbòl na Merka i na Hulanda. Nan a mustra riba e diferensia entre e dosnan ei. E diferensia ta hopi grandi. Dencho ta kòrda ku ora el a sali Kòrsou bai Hulanda e tabata mentalmente fuerte i físikamente fuerte pero téknikamente i táktikamente e tabata hopi atras. Nan a bis’e ku asta riba e parti táktiko e ta na nivel di mas òf ménos 14 aña, ke men 5 aña atras esei ta pasobra na Kòrsou e no a siña kon por bai òm ku un bala di forma tékniko ounke na nivel di kondishon e tabata hopi bon. E diferensia entre e dos paisnan ei ta ku na Merka nan ta konsentrá mas riba e físika pero mentalmente nan tin pashon. Na Oropa ta mas téknika so bo ta haña. Tur kos ku bo ta hasi den un training ta puramente dirigí kon ta manehá e bala. Dencho su hungadó preferí ta unu ku hopi téknika pero tambe mentalmente i físikamente bon. E por kombiná e mundu di Oropa i Merka huntu. Pa loke ta Justin el a bisa ku den su kaso komo futbolista e gusta oropeo. Na Merka e mihónan ta den beisbòl/basketbòl i na Oropa e mihónan ta den futbòl. I p’esei einan e por midi su mes. Pero pa mentalidat i físika ta Norte Amérika, sur Amérika i Karibe i Oropa tin e téknika. I manera Dencho a bisa, segun Justin, pa loke ta téknika ta trein e hóben di 8 te ku 12 aña. Konsekuentemente por siña e hóben e téknika pero no por siñ’é kore 90 minüt largu, no por siñ’é tin un bon pulmon i loke nos na Kòrsou i na Amérika tin di naturalesa. E mentalidat di kaya, e mentalidat di hamber pa e wega no ta algu ku por siña e hóben pero ta algu ku e mester tin di naturalesa. I awor por mira e timnan profeshonal ta bai den e direkshon ei. Mira awor timnan profeshonal tin hopi hende di koló. Wak Fransia mayoria ta hende di koló pasobra por siña e persona e téknika, pero e kore duru i e mentalidat no por siña e hende.
Den Amérika ta hasi kueste loke kueste pa logra
Na Hulanda nan ta yama e mentalidat di aki banda komo e “overlevings drang” kaminda ta hasi tur kos pa gana. I esei ta loke nan ta sinti falta di dje na Hulanda. Dencho a bisa ku na Hulanda tur kos ta keda regla pa bo; si bo mester di ‘voetbalschoen ‘bo ta haña, ta sòru pa unifòrm i tur kos pa e hungadó. Ora nan biaha nan ta keda den hotèlnan di luho, ta haña preferensia, transporte, warda riba nan i esei ta afektá e mentalidat. Na sur Amérika ta e hungadó mes mester sòru pa loke e mester. E hungadó ei mester sòru pa e yega training. I p’esei esun den sur Amérika ta laga esei mira tambe den e weganan kaminda kueste loke kueste e tin di logra pasobra e tin di yuda tin bia su mama òf yuda un ke otro hende mas. Na Hulanda ta regla tur kos pa bo, for di chikí. Esei ta e diferensia mas grandi ku Amérika.
Feyenoord Camp
Loke nan ke logra ta duna e hóbennan di Kòrsou un eksperensia kon pa trein na un klup profeshonal. E training ta base di tema. E dia ta parti den 2, ta siña tepnan chikí pa hasi e hóben un mihó hungadó. Siña e hóben pensa pasobra hopi bia ta hunga futbòl riba instinto. Hopi kos segun Justin den futbòl nan ta bisa otro por ehèmpel pasa e bala i den e kampamentu ta siña e hungadó ta independiente riba vèlt. Ta un siman di training manera nan ta haña na Feyenoord. Dencho a bisa ku no ta simplemente bai kore tras di bala pasobra pa nan futbòl ta un deporte ku tin di pensa. Tur desishon ku tuma riba vèlt mester pensa. Den futbòl tur kos ku hasi mester tin un bon motibu su tras. E kampamentu ta tuma lugá a SUBT i Willemstad. E ta pa hóbennan di U-8 te ku U-18. E kampamentu ta yen kaba i tin 145 hóben pa partisipá i nan di Feyenoord lo bai algun klup pa buska 5 hungadó ku tin potensial pa bira hungadónan di e kamp. I pa esnan ku no ta inskribí ainda tin chèns. I den e 150 partisipantenan na e kampamentu lo saka entre 1 pa 2 hungadó ku nan ke bai Hulanda kuné pa bai den direkshon di bira profeshonal den futbòl. Ya kaba nan a bishitá algun klup i segun Dencho ora el a mira nan trein el a mira un diferensia hopi grandi di tempu e tabata hunga futbòl na Kòrsou.
Futuro
I nos no por a terminá e kombersashon ku e dos hóbennan aki sin puntra nan kon nan ta mira nan mes den futuro pa loke ta futbòl. Dencho ta mira su mes komo un direktor general den klup na Merka. El a mira e posibilidatnan na Merka pa e lanta su mes klup i asina habri porta pa e hóbennan di Kòrsou tambe. El a bisa ku e chèns ku e mes no a haña e ke brinda e hóben di Kòrsou. E sa kuantu talento i potensial tin. E sa ku tur siguransa ku meskos ku ta pasando den beisbòl por den futbòl tambe. I di einan e lo traha un drihuk di Merka, Hulanda i Kòrsou pa e mihónan bai Hulanda i otro parti Merka i kombiná skol i wega di bala i asina bira ‘role model’ pa e hóbennan di Kòrsou. Pa loke ta Justin a bisa ku el a bai Hulanda puramente pa futbòl pero semper el a bisa ku e ke hasi e kos ku su pashon ta ku ta trein futbòl i esei ta pone su isla riba mapa i esei e ke habri porta pa hóbennan a Kòrsou den diferente forma. E ke tin kontaktonan na Kòrsou, Hulanda i Merka pa e oportunidat pa e hóbennan. I si e mucha ku nan skohe awor aki logra e lo habri porta pa otronan. Awor aki nan tin e posibilidat komo coach dor di pone kontakto i habri porta. Justin a bisa ku e ke habri e porta pero no tene e porta habri pero e hóbennan tin di hasi esaki. Tur loke e ke hasi ta pa Kòrsou. Tur soño ta posibel. Ku esfuerso e ta kere ku e por yega leu ku su soño.
